Докъузпара райондин Мискискарин хуьряй тир Саркароврин хизан республикадилай къецени фадлай машгьур хьанвайбурукай сад я. Зун сифте и хизандай тир Дагъустандин гостехуниверситетдин декан, технический илимрин доктор, профессор, электротехникадай хейлин цIийивилерин патентрин сагьиб Тажидин Экберовичахъ галаз таниш хьанай. Ам зи къуншидал яшамиш жезвай. Гьар экуьнахъ, зарядка ийидайла, чун гьуьлуьн кьере туьш жедай.

 Ахпа зун, жуван пеше себеб яз, «Дагэнергодин» кьилин инженер, «СССР-дин лап хъсан рационализатор,  «ДАССР-дин лайихлу энерге­тик», «Россиядин Фе­дерациядин­ ла­йих­лу­ энергетик»­, «РФ-дин чимивилинни энергетикадин комп­лексдин гьуьр­­метлу работник»­, «Зегьмет­дин вете­ран» медал­рин, «Рос­сиядин ЕЭС-дин лайихлу ра­ботник»­ гьуьрметдин­ лишандин сагьиб Сар­каров  Сейфулла Акберовичахъ галаз таниш хьана.

Дуствилин ала­къайри заз абурун Москвада авай стха, РАЕН-дин академик, газдин ва нафтIадин РГУ-дин профессор, технический илимрин доктор, РФ-дин лайихлу геолог, гьуьрметлу нефтяник, РФ-дин газдин­ промышленностдин гьуьрметлу къуллугъчи, И.М. Губкинан  премиядин  лауреат Серкер Акберовични чирна.

Са вахт алатайла, за абурун стха, технический илимрин доктор, термоядерный ахтармишунардай ин­сти­тутдин директордин заместитель Нижеф Саркаровакай макъала кхьена.

Саркароврихъ технический илимрин кандидат, «Газпром ВНИИГАЗ» ООО-дин газ хкуддай технологийрин центрадин начальниквиле кIвалахзавай Рамидин стхани ава. Ингье и йикъара адахъ галазни таниш хьана. Адан руш Мединадини бубайрин рехъ ва илим хкяна. И мукьвара ада медицинадин илимрин кандидатвилин диссертация хвена, РФ-дин образованидинни илимдин министерстводи адав илимрин кандидатвилин диплом вахкана.

Медина Саркарова 1992-йисуз дидедиз хьана. Да­гъустандин медицинадин академиядин лечебный факультет лап хъсандиз куьтягьай (кIелни ийиз, ада кьве йисуз шегьердин 1-нумрадин больницада медсестра­вилени кIвалахна) руш Москвадин И. Сеченован тIва­рунихъ галай медицинадин университетдин ординатурадик «Терапия» пешедай экечIна.

2017-йисуз ада МГМУ-да гастроэнтерологиядай, са йисалай А. Бурназянан тIварунихъ галай медицинадин федеральный биофизикадин центрада ультразвукдин­ диагностикадай чирвилер къачуна. Гуьгъуьнлай МГМУ-да машгьур профессорривай ва пешекарривай диетологиядин сирерни чирна.

2018-йисуз Медина МГМУ-дин лечебный факультетдин къенепатан азаррин кафедрадин аспирантурадик экечIна. Республикадин медицинадин идарайра  гаст­роэнтерологвиле, диетологвиле кIвалахни ийиз, диссертациядал кIвалахна. Вад йисан зегьмет хъсан нетижа галайди хьана. 2026-йисан майдиз Саркаровади РФ-дин Президентдин крар идара ийидай Управленидин государстводин медицинадин академияда «Прог­ностическое значение показателя отношение нейтрофилов к лимфацитам в клиническом течении цирроза печени» темадай диссертация хвена.

2020-йисалай Медина Рамидиновнади Дагъустандин медицинадин академиядин терапиядин факультетда, «Целитель» клиникада зегьмет чIугвазва. Ада республикада ва Россиядин регионра тешкилзавай Вирироссиядин ва международный конференцийра иштиракзава, вичин чирвилер артухарзава. Илимдин изданийра мукьвал-мукьвал адан макъалаяр акъат­зава.

Мединади хизанда гьелелиг са веледдиз тербия гузва.

Нариман  Ибрагьимов