И йикъара чун тIебиатдин завал­дик зиянар хьанвай мамед­къа­лавийриз цIийи кIвалер эцигзавай мулкунал фена, ана кIва­лахар кьиле физвай гьалдихъ галаз таниш хьана.

Чаз акурвал, ина са куьруь вахтунда бегьем кьадар кIвалахар тамамарнава. КIвалер эцигун па­тал хкянавай мулк хъсандиз къай­дадиз гъанва. Яру керпичрикай­ мягькем къандахрал 52 кIвал эциг­нава. Гьар са дарамат­дин къа­вуз ракьни янава. Са проект­дин бинедаллаз эцигнавай гьар са дараматда пуд кIвал, гегьенш тавхана, кIвалера чимивал таъминардай система ва санузел ава. Вири кIвалер эквералдини газдалди таъминарнава.

Чаз ина кIвалахар кьиле тухузвай прораб Гьейбулагьахъ галаз рахадай мумкинвал хьана. Адан гафаралди, 52 кIвал эцигу­нин кIва­лахар акьалтIарнава. Мукь­­ва­ра кIвалерин жугъунарни­ эцигна акьалтIарда. Кьилди­ къа­чуртIа, къенин йикъалди 12 кIва­лин къецепатан цлар сувагъ­на­ва­, 27 кIвалин цлар короеддалди­ (сувагъдин са жуьре) чIа­гурнава­, къенепатара сувагъар­ авунин­ кIва­лахар 14 кIвале акьал­тIар­­­­на­ва­. Кьве бригадади цлар су­вагъ­зава­. Ирид санузелда кафель тун­ва. КIвалерин гьаятар бетон цаз гьазурнава. ЦIийиз арадал къвезвай­ микрорайондин куьчейра тротуа­­­рарни жеда. Гьелелиг анра куьбе­яр эцигнава. И мукьвара вири­ кIвалерик ракIарарни кутуна акьал­­тIардайвал я.

РикIел хкин: алай йисан 5-6-ап­релдин йифиз тIебиатдин бед­бахтвили Дербент райондин ке­ферпата ва кьиблепата авай хуьрериз бегьем зиянар ганай. Арадал атанвай муракаб гьалариз килигна, Дагъустанда 7-апрелдиз – региондин дережадин, 9-апрелдиз федеральный дережадин ЧС (кьетIен гьаларин режим) малумарнай.

1970-йисара эцигнавай Геджухдин бандунилай къвайи марфарикди сифте яд алахьиз га­тIун­на, ахпа ам пад хьана. Ана авай кьван яд агъада авай са шумуд хуьруьхъди фена. Нетижада вад инсан кьена, агъзурдав агакьна инсанар хатасуз чкайриз акъудна, гзаф кIвалер чкIана. Араблинка ва Рукель хуьрерин мектебар чкIидай гьалдиз атана, анра тарсар тухудайвал амачир. Виридалайни гзаф зиянар Мамедкъаладиз хьанвай. МЧС-дин делилралди, 260 кIвал це гьатна, 30 кIвал михьиз чкIана.

Россиядин Президент Владимир Путина Дагъустанда арадал атанвай четин гьалар веревирд авун патал жавабдар органрин векилрихъ галаз совещание тухвана. Нетижада Президентдин тапшуругъдалди РФ-дин Гьукуматди Дагъустанда бедбахтвилик акатнавай инсанриз вири патарихъай­ куьмекар гудай къарар кьабулна. Завалдик акатай агьалийриз куьмекар гуз, кьуд патахъай гуьгьуьллубур кIватI хьана. Меценатри, жемятди гьарда вичивай жедай пулдин куьмекар гана. Са гафуналди, абур бедбахтвиле текдиз тунач.

Къагьриман Ибрагьимов