28 йис идалай вилик Махачкъалада Россиядин къенепатан кьушунрин кьилдин бригада (оперназначения) арадал гъанай. Къурулушда дегишвилер кьиле фейила, бригададикай Росгвардиядин Махачкъаладин (соединенидин) воинский часть хьана. И йикъара ам арадал атуниз талукьарнавай лишанлу югъ къейдна.

Мярекат къанун-къайда хуьдай органрин телеф хьайи къуллугъчийриз хкажнавай мемориалдал цуьквер эцигунилай башламиш хьана. Частунин  командирдин везифаяр вахтуналди тамамарзавай полковник Максим Апаровича кIватI хьанвайбуруз лишанлу югъ тебрикна, ана зегьмет чIугвазвай ксари — военный къуллугъчийри — вилик эцигнавай кIвалахдинни женгинин везифаяр жуьрэтлувилелди, намуслувилелди кьилиз акъудзавайди къейдна.

— Бригада арадал атайдалай инихъ 300-далай виниз къуллугъчияр женгера кьегьалвал къалурунай гьукуматдин шабагьриз ла­йих­лу хьана, амма, гьайиф­ хьи, хкатунарни авачиз туш. 90-далай виниз ксар, кIвалахдин везифаяр кьилиз акъуддайла, телеф хьана. Абурун экуь къаматар чи рикIера гьамишалугъ яз амукьда. Гьалтзавай четин­вилеризни килиг тавуна, зун инанмиш я, частуни инлай кьулухъни уьлкведин хатасузвал ва итижар хуьн патал вилик эцигнавай везифаяр намуслудаказ ва агалкьунралди кьилиз акъудда. За ина зегьмет чIугвазвай гьар садаз сувар тебрикзава. Квехъ ва куь багърийрихъ  чандин мягькем сагъвал, хизанра хушбахтлувал, кьилелни ислягь цав ва Ватандин абадвал патал къуллугъда агалкьунар хьурай! — алхишна Максим Апаровича.

Мярекат къуллугъ кьиле тухудайла тафаватлу хьайи ксарив грамотаяр ва къиметлу пишкешар вахкуналди акьалтIна.

Рагнеда  Рамалданова