Аялриз – экскурсия
И йикъара Росгвардиядин Дагъустан Республикада авай Управленидин «Горец» ОМОН-дин (отряд милиции особого назначения) къуллугъчийри Махачкъаладин 34-нумрадин мектебдин Росгвардиядин профилдин классдин аялар патал санай масаниз фидай интерактивный «Гъалибвилин поезддиз» экскурсия тешкилна. Аялриз дяведин йисарин девирдиз килигдай, адан гьакъикъат гьиссдай мумкинвал хьана. Дишегьли машинист Лидиядин мецелай суьгьбетзавай тарихдин чинри дяведикай аялриз малуматар артухарна.
РикIел хкин: Махачкъала «Гъалибвилин поезд» акъвазнавай кьвед лагьай шегьер тир. Ам къаршиламишуниз талукьарнавай шад мярекатда Дагъустандин Халкьдин Собранидин Председателдин заместитель Елена Павлюченкоди, шегьердин мэр Жамбулат Салавова, жегьилрин крарин рекьяй министрдин везифаяр тамамарзавай Камил Саидова, Дагъустандин Халкьдин Собранидин депутат Марат Алиярова ва масабуру иштиракнай. Меркезвийриз поезддин 10 вагонда Ватандин ЧIехи дяведин вакъиайриз талукьарнавай, дуьньяда и жуьреда туькIуьрнавай сад лагьайди тир иммерсивный (инсанди вичиз аквазвай вакъиайра иштиракзавайди хьиз гьиссзавай) выставкадиз тамашдай мумкинвал хьанай.
Аялар гьар са вагондиз фена. Абуру гьар сада дяведин са пай къалурзавай. Аялриз аскеррин яшайиш, гьавадин женгерин ва танкарин гьужумрин шикилар акуна. Дяве башламишдалди виликан девирдикай рикIел хкунрихъни яб акална.
ОМОН-да сиясатдиз талукь кIвалах тухунай отделенидин
пешекар, полициядин мл. лейтенант Гь. Межидова серенжемдин важиблувал къейдна.
– Экскурсиядин кьилин макьсад акьалтзавай несилар
ватанпересвилин руьгьдаллаз тербияламишун, абуруз чи уьлкведин игитвилин тарих
чирун я. Чи вилик аялриз неинки вичихъ тешпигь авачир композиция къалурун ва
дяведин девирдин шикилрихъ галаз танишарун, гьакIни гъалибвал къазанмишунин
къимет къалурунин везифа акъвазнавай. Нетижа чна гуьзлемиш тавурди хьана.
Аялрин рикIериз экскурсияди, акунвай шикилри, затIари акI таъсирна хьи,
абурувай чпин гьиссер, итиж чуьнуьхиз жезвачир. Гузвай кьван суалри и кар мадни
хъсандиз субутзавай. Ихьтин серенжемри аялрик ватанпересвилин руьгь кутазва,
абуруз Ватандин вилик чпин хиве жавабдарвал авайди чирзава, – алава хъувуна
ада.
Регина Семедова