СФР-ди алай йисан 1-квартал патал раижнавай малуматдал асаслу яз, январдиз, февралдиз ва мартдиз чи уьлкведа саки 75 агъзур бицIек, чпин хизанра 3, 4, 5 ва я адалай гзафбур яз, дуьньядиз атана. Ибурун арада хизанра пуд лагьайбур яз ханвай аялрин кьадар виридалайни винизди я (44 951). Гзаф аялар авай хизанра виридалайни гзаф аялар январдиз дуьньядиз атанва. Абурун кьадар 27 439 я. Мадни шаддаказ а кардикай хабар гуз кIанзава хьи, Москвадихъ, Москвадин областдихъ ва Краснодардин крайдихъ галаз сад хьиз, Дагъустандини, гзаф аялар авай регион яз, башчивал хуьзва. ИкI, цIийи малуматда хабар гузвайвал, гзаф аялар авай 3 474 хизанда 12 743 аял чIехи жезва. Гуьгъуьнал Чечня (2 412 хизанда 9 838 аял) ва Татарстан (667 хизанда 2 322 аял) ала.
ЦIинин йисалай башламишна, кьвед ва адалай гзаф аялар авай хизанриз гьукуматдин патай куьмек яз йиса садра пул гузвайди рикIел хкиз кIанзава.
СФР-дин Дагъустанда авай отделенидин малуматдал асаслу яз, Россиядин хизанриз куьмек яз, гузвай авайбурал алава тир и пулунин кьилин макьсад чпин хизанра кьвед ва адалай виниз аялар авай кIвалахзавай диде-бубайриз куьмек гуникай, яни абуру гьукуматдиз гузвай налогдин (НДФЛ) пай абурув вахкуникай ибарат я. Амма и пул виридаз гузвач.
— 2026-йисалай эгечIна, йиса садра гузвай и пул уьлкведин са кьадар хизанар патал еке куьмекдиз элкъведа. Чи республикада лагьайтIа, ам 300 агъзурдалай виниз хизанрив агакьда. Чи кьилин везифа игьтияж авай гьар са диде-бубадив ам вахтунда агакьаруникай, гьакI ам къачунин къайда кьезиларуникай ибарат я, – къейдзава СФР-дин Дагъустанда авай отделенидин регьбердин везифаяр тамамарзавай Алжанат Загьидовади.
Гила – кьилиндакай. Аялрин амай са жерге пособияр хьиз, и пул къачун патални важиблу са шумуд шартI ава: диде-буба кьведни датIана чи уьлкведа яшамиш жезвайбур ва налогар чи уьлкведа гузвайбур хьун лазим я. Идалай гуьгъуьниз кьилин шартI – хизанда авай гьар са касдал Дагъустанда яшамиш хьун патал тайинарнавай агъа кIанин кьадардин 1,5-далай виниз ацалтна кIанзавач, яни, винидихъни къейднавайвал, и пул анжах игьтияж авай хизанриз гузва. Къенин юкъуз Дагъустанда яшамиш хьун патал тайинарнавай агъа кIанин пулунин кьадарди 17 234 манат тешкилзава.
Пул йиса са сеферда гунихъ галаз алакъалу яз, хизандивай и пул къачун патал арзаяр алай йисан 1-июндилай къведай йисан 1-октябрдалди гуз жеда. Арзаяр «Госкъуллугъар» порталда, республикадин Яшайишдин фондунин муьштерийрихъ галаз кIвалахдай къуллугъра ва МФЦ-да гуз жеда.
Рагнеда Рамалданова
