Алай йисуз Мегьарамдхуьруьн райондин ругуд хуьре паркар туькIуьрзава
Мегьарамдхуьруьн районда “КIвалер ва шегьердин шартIар” милли проектдик акатзавай федеральный “Алай аямдин шегьердин шартIар арадал гъун” программа кьилиз акъудиз са шумуд йис я.
“Лезги газетдиз” муниципалитетдин администрациядин пресс-къуллугъди хабар гайивал, цIи и программадин сергьятра аваз Советский, Самур, Билбил-Къазмаяр, Чахчарин-Къазмаяр, ЦIийихуьр ва Бут-Къазмаяр хуьрера аялар къугъвадай махсус майданарни галай паркар туькIуьрзава. Алай вахтунда кIвалахар, лугьудайвал, худда ава.
Мегьарамдхуьруьн райондин кьил Фарид Агьмедова къейдзавайвал, муниципалитетди ихтилат физвай программада иштиракунин нетижада хейлин хуьрера жемиятдин мулкар аваданлу ийидай, чкадин агьалийриз ял ядай къулай шартIар тешкилдай мумкинвилер хьанва.
Къейд ийин хьи, винидихъ тIварар кьур хуьрера паркар туькIуьрун патал, санлай къачурла, 19 миллионни 288,46 агъзур манат пул харждайвал я. Такьатрикай 15 миллионни 776,716 агъзур — федеральный, 159,361 агъзур — республикадин ва 3 миллионни 352,383 агъзур манат райондин бюджетрай чара авунва.
Чи мухбир
