И йикъара Къазахстандин меркез Астанада кьуршахар кьунай кьиле фейи дуьньядин чемпионатда Дагъус­тандин хкянавай командади 9 медаль къа­зан­мишна. Кесерлу майданра рес­пуб­ли­ка­дин тIвар хкажай спортсменрин­ агалкьунрал, гьелбетда, чун гзаф шад я.

Амма абурун арада, республикадин хкянавай командада, чи миллетдин векилар садни авач. Гьайиф къведай кар мадни ам я хьи, маса уьлквейрин патай экъечIай чи ватандашрин – Даурен Куругълиеван, Жабраил Гьажиеван, Шамил Мамедован бахтуни и сеферда гъанач.

Дугъриданни, спортда гьайиф чIуг­ва­дай вахтарни жеда. Яргъал вахтунда, гьатта йисарани чIугур зегьмет садлагьана, лугьудайвал, тIач хьайила, гьикI гьайиф къведач кьван! Къуй чи ватанэгьлийриз туькьуьл тежриба гележегда къуватдиз элкъуьрунин тарс хьурай! Эхь, гьамиша крар чаз кIандайвал жедач, амма гьар пис кардихъни хъсанвал авайди рикIелай ракъур тийин.

Рагнеда  Рамалданова