Са тIимил йикъар идалай вилик, СтIал Сулейманан райондин кьилин сад лагьай заместитель Заур Къагьриманован регьбервилик кваз Алидхуьре мискIин эцигуниз талукь месэлаяр веревирдна.

Алидхуьруьн агьалияр патал диндин цIийи идарадихъ авай важиблувал къейд авуналди, и кардик кьил кутунвай дестеди проектдихъ галаз танишарна. Райондин кьилин куьмекчи Эльдар Рустамова адан кар алай, кьилин терефрикай лагьана.

Проект веревирддайла, мискIин эцигунин харжияр вичин хивез къачунвай меценат Шагьпаз Асаханова хийирдин и кар патал вич са кьадар такьатар чара ийиз гьазур тирди къейдна. Идалайни гъейри, ада мискIин лазим коммуникацийралди таъминариз гьазур тирди раижна.

Заур Къагьриманова къейд авурвал, меценатдин куьмекди неинки мискIин эцигунин кардик гьерекат кутада, гьакI жемият руьгьдин жигьетдай вилик финни таъминарда. Ада мискIин эцигунин карда хуьруьн агьалийри, къени крарик пай кутадай вири ксари активнидаказ иштиракунихъни важиблувал авайди къейдна.

Чи мухбир