Наира Алидесан тIварцIи фикирдиз гьар сеферда адан аялар патал махарин ажайиб, суьгьуьрдин дуьнья гъизва. Педагогикадин илимрин доктор, профессор ва… махар! Ибур чеб чпив кьадай крар яни? Эхь, кьадайбур я, къейднай гьеле Сергей Меликова, Алиева Наира Надирбеговнадив адан гуьзел эсерар лайихлу хьайи республикадин госпремия вахкудайла.
Хиве кьан, аял девирда зазни махариз яб гуз кIандай. Бадеди ахъайзавай махариз. Лап гъвечIи йисарилай эгечIна, цIуд лагьай класс куьтягьдалди, зун адан патав хьанай. Школада, вири хуьрени заз «къаридин хва» лугьудай.
Ингье гила Наира Алидесан яратмишунрин кIвалахда цIийивилерикай яб гудайла, абурун мензилар гьисаба такьазвай итижлувили ва жуьреба-жуьревили гьатта тажубарзава. И цIийивилерикай хабарар Москвадайни Петербургдай ва чи зурба уьлкведин маса регионрай, гьатта сергьятрилай къецепатайни агакьзава, месела, Китайдай ва Монголиядай. Жува-жувакди за фикирзава: «ХупI хьана Дагъустандин халкьдиз Наира Алидес аваз!»
Хуш я адан махариз, абур авторди вичи ахъайдайла, яб гуз. Абуруз лап рикIивай архайин декьикьайра яб гана кIанда. За мад фикирзава: «Вучиз Махачкъалада Махарин кIвал ачухдач? Са жуьре «Пушкиналай — Гьамзатовал” хьтинди…» Я акьулдиз, я рикIиз, зарардилай гъейри, хийир тIимил гузвай телефонрал машгъул жедалди, Махарин кIвализ атуни чи аялрин руьгь ацIурдай, абуруз писни хъсан чара ийиз чирдай. А махариз милли чIаларалдини яб гудайвал авунайтIа…»
Мадни заз акI жеда, Наира Алидесан махара кьвед лагьай дережадин, яни куьлуь игитар авач. Мисал яз, са махуна гъвечIи хушракандилай.
Наира Алидесахъ ва адан гуьзел хизандихъ галаз чи рафтарвилер садрани кьведра хьайиди туш. Абур акьалтIай интеллигент, рикI ачух инсанар я. И хизанда гъвечIи хциз ам ксудалди вилик махар ахъайдай адет са арада лап государстводин дережада важиблу кардиз элкъвена! Эхь, гьелелиг и кардин гъавурда гзафбур акьазвач, амма зун лап кIевелай умудлу я, адахъ вичин къимет гележегда агакьда.
Ингье цIийи шабагьни!
Наира Алидеса «Эпоха» издательстводин кIвалихъ галаз санал АСКИ-дин (Ассоциация книгоиздателей России) са гегьенш конкурсда вижевай гъалибвал къазанмишна. Ада «Волшебный мир дагестанских сказок» вад ктабдикай ибарат серия «Лучшая книга – 2025» яз малумарна. Фикир желбзавай кIвалах ам я хьи, шабагь вахкудай мярекат 6-июндиз, Пушкин хайи юкъуз, Москвада ктабрин международный «Яру майдан» фестивалдал кьиле фена.
Са шумуд гаф «Эпоха» издательстводин кIвалин директор Хадижат Кураховадикайни лугьун тавуна жедач. Заз ам рагьметлу Гьамзат Гьамзатован (виликдай республикадин Общественный палатадин председатель) галатун тийижир кIвалахдихъ галаз алакъалу яз таниш я. Хадижатани Наиради санал тамамарзавай крарик берекат ква, абуру агъзурралди инсанрин (са аялрин ваъ) рикIер шадарзава.
Алюсет Азизханов
