Россиядин МВД-дин СКФО-да авай къуллугъчийри РФ-дин ФСБ-дин чи республикада авай сергьятриз талукь управленидин къуллугъчийрихъ галаз санал «Сулак» КПП-дал къанундалди ихтияр авачир, чинеба кьунвай 400 килограммдилай гзаф буькредин як (осетрина) дуьздал акъудна.
Гуьзчивилин постунал 42 йисан яшда авай чкадин агьалиди гьалзавай машин (эвакуатор) акъвазарна. А машинда аваз агьалиди международный икьрарралди кьунал къадагъа алай, «Яру ктабда» гьатнавай буькре балугъар хутахзавай. Улакь ахтармишунин нетижада буькредин жинсинин 141 балугъ авай пакетар жагъана. Санлай къачурла, абурун заланвал 400 килограммдилай артух тир.
Пешекарри къимет ганвайвал, къанунсуздаказ кьилиз акъудай тахсиркарвилин гьерекатди 19 миллиондилай гзаф зиян ганва.
А касдиз талукь яз Россиядин ФСБ-дин Дагъустанда авай сергьятриз талукь управлениди РФ-дин УК-дин 258.1-статьядин 1-паюнай уголовный дело къарагъарнава.
«Лезги газет»
