18-июлдиз Махачкъалада республи­ка­дин государстводин ва муниципа­литетрин гьукумдин органра кIва­лах­завайбурун арада тешкилнавай Спартакиада гатIунна. Россиядин халкьарин садвилин йисаз ва Физкультурникдин йикъаз талукьарнавай и акъажунар 8-августдалди давам жеда.

Лагьана кIанда, Спартакиададин сергьятра аваз, спортдин са шумуд жуьредай акъажунар кьиле физва. Сифте нубатда командайрин арада футболдай турнир тешкилна. Матчар РД-дин образованидин ва илимдин министерстводин РДЮСШ-дин майдандал кьиле фена. Футболдилай гъейри, Спартакиададин иштиракчийри чпин къуватар кьезил атлетикада, теннисда, сирнав авуна, баскетболда, шахматрал къугъуна алцумзава.

Баскетболдай кьиле фейи турнирда 1-чкадиз Кьурагь райондин команда ла­йих­лу хьана. Кьилди къачуртIа, кьурагьвияр Хасавюрт шегьердин, Махачкъаладин администрациядин ва РД-дин налогрин полициядин командайрихъ галаз къугъвана. Вири гуьруьшар Кьурагь райондин командадин хийирдиз акьалтIна. Гъалибчийриз кубок ва 1-дережадин дипломар гана.

Къейд ийин хьи, Спартакиада акьал­тIаруниз талукьарнавай мярекатар Физкультурникдин югъ къейдзавай 8-августдиз Махачкъалада «Труд» стадинондал кьиле фида.

Чи мухбир