Ламни хеб

ГьикI ятIани, ламравай

Хабар кьуна хипе са:

«Гьикьван ялда датIана

Идан-адан пар вуна?

Ксуз цурин пипIе са,

Къазанмишна эхирдай

Темпел ламран тIвар вуна».

«Эхь, - лагьана ламрани, -

Заз зи тIварни, пешени

Зи чандилай масан я.

Дуьньядикай хабарсуз,

ЧукIул алай туьтуьнал,

Вун хьтин хеб хьунилай,

Винел даим пар алай

Гьа лам хьунни хъсан я!»

Ламни шаркIунтI

Хабар кьуна шаркIунтIди

Пар алай са ламравай:

«Лагь, гуьнедай эвичIун

Регьят яни, тахьайтIа,

Аста-аста экъечIун?»

«Эгь, - лагьана а ламра, -

Ни вахъ галаз суьгьбетрай,

Далудал пар алайла,

Дуьз рекьизни лянетрай!»

"Лезги газетдин" 2023-йисан 46-нумрадай.

____________________________________________________

Веси

Заз и дуьньяда такур затI амач. За халис дуствиликайни­ лезет къачуна, зун акьалтIай хаинвилини кана. Захъ уьмуьр­да зун ва заз кIаниди хьана. Зак муьгъуьббатдини лувар кутуна, чаравилини зи гъам артухарна. Заз етимвилин мусибатни чир хьана, бубавилин гьиссни. Амма абурулай виридалайни винизди за зи хайи халкьдиз къуллугъ авун яз гьисабна.

Иердаз иер рикIни хьанайтIа, викIегьдаз цIай хьтин уьмуьр­ни ганайтIа! Иервал – дишегълидиз, викIегьвал итимдиз хас я. Бахт бедбахтвилелай гуьгъуьниз къведа. ЧIехи гъалибвал гъвечIи агалкьунрикай ибарат я. Са метлеб рикIе авай итимрин фикирар чара хьайитIани, абурун мурад сад жеда, – гьа ида абурун умуми кардин гьахъвал ва винизвал тестикьарзава.

Уьмуьрдин къанунар виридаз сад я. И дуьньяда гьа са вахтунда гьам михьи, гьамни чIехи итим хьунухь мумкин туш. Уьмуьр тIурфан я, тIурфандин хура акъваздай викIегь ксар кIанда. ТIурфандай рехъ жагъурдайди игит я. Уьмуьр яшамиш хьун патал ганвайди я. Сад ава –  жув патал, сад ава – халкь патал. Анжах са вич паталди алахънавайдаз халкьдин къайгъуда авайди такIан жеда. Уьмуьрдин къимет гзаф яшамиш хьун ваъ, адан гъакъикъи къимет чир хьун я. ЧIехи мурад авачирдаз чIехи уьмуьрни жедач.

Секиндаказ яшамиш жезвайди aтIaнвай тap я, вичин уьмуьр­дилай рази кас ктIизвай кIанчI я. Руьгьдин азаб чIу­гун тавурдакай, яшайишдин дарвилер такурдакай халкьдин рикIел аламукьдай, гьуьрмет авай кас жедач.

Зулумкаррин рикIер, сурар акурла, хъуьтуьл жеда. Ясдал фидайла, инсанриз садаз сад пара кIан жеда. Мейит кучукдайла, вирибурун рикIера регьим гьатда. Кьиникьикай кичIезвайдавай уьмуьрдин четин рекьерай виликди физ жедач. Кьиникьи итим, гьина хьайитIaни, жагъурда. Кьенвайдаз ийизвай гьуьрметарни игьсандин мярекат чан аламайбур патал я.

Жегьилри кьуьзуь итимдивай игитвал тIалабда. Кьуьзуь итимди лагьайтIа, вич гьинал ва гьикI кучукдатIа, гьадакай фикирда. Жегьилвал - ханвал, кьуьзуьвал къанвал я. Вичел пис тIвap атунихъай кичIе туширди женгера викIегь жеда.

РикI михьи инсан виpт авай куьнуь я: вири адал алтуг жеда. Халис игитдиз вичин викIегьвиликай хабар жериди туш; адан игитвал кьатIудайбур несилар я. Игьтиятни кичIевал викIегьдакай ажузди ийидай ycтIapap я. Кьве рикIин инсандив са кардин икьрар жедач. Четинвилер къуват авай инсанрал гьалтда.

Кесибди гзаф кIвалахда, девлет авайда акьулар гзаф гуда. Акьул авачирдаз - гьуьрмет, акьул авайдаз девлет герек туш. Акьул авайдазни къуват авайдаз вирибуру гьуьр­метда. Къуват авайдан тахсирдилайни гъил къачуда, къуват авачирди тахсир квачизни кIурарик акатда. Акьул авачирдахъ - регьим, акьул авайдахъ зулум хьун мумкин туш. Гьавиляй акьул авайбур ам авачирбурун желеда гьатда. Пака вуч жедaтIa течизвайди бахт авачир кас я. Бахт акьул я; акьул авайдаз кьиникьихъай кичIе жедач, амма гзаф акьул авайдахъ душманарни гзаф жеда.

Хеб тIуьна лугьуз, жанавурдиз экъуьгъмир, чубандиз экъуьгъа. Вичивай вич хуьз тежедайдан къимет чат кепек я. Нагьахъ чкадал масадавай гьахъ тIалабмир. Къуншидин къадир течидайдаз, ватандин къадирни чир жедайди туш. Ватан кIанзавайдан рикI ватандихъ кана кIанда. Ватан такIандайдаз хайи дидени кIанзавайди туш. Дидед чIал бегенмиш туширдаз акьуллу итим лугьуз жедач. Акьуллу итимди вичин халкьдин тIвap вине хуьда.

Кьил тIазвачирда кьилик дасмал кутIунда. Са юкъуз ам тIa хьурай лугьуз?! Кьил анжах бармак алукIун патал туш. Акьуллу итим алатай кардихъ шехьдач. Гьахъ кар акьул авачирбурун гъиле гьатайла, ам кьилиз акъатдач; адан гуьгъуьна камаллу итимар кIанда. Жуван гъалатI жува туькIуьра. Жуваз акьул авачтIа, чарада гайидакай файда жедач.

Азадвал фу я. Ам гзаф тIуьна, руфун заланармир. Азадвили зегьмет кьезиларда. Зегьмет тIимил тахьурай, тахьайтIа рикI хажалатдив aцIyдa. Xaжалатди яцравни, билбилдив хьиз, манияр лугьуз тада. Звер авачир беденда иви ктIида; вердиш туширдаз аш тIуьнни четин я. Азадвал кIанзавайдаз дарвал кьисмет жеда. Азиятар гьисс авур инсандиз азадвал багьа жеда, гьавиляй азадвал жув жуван иеси хьунухь лагьай чIал я. Чарчеллай азадвал къведай йисан гатуз къвана кIанзавай марф хьтин затI я. Сияси азадвили халкь чIехи, викIегь, гьуьрмет авайди ийида.

Гъам авачир инсандиз рикIни авач. Гъам хьаначиртIа, шадвилин къадир низ чир жедай кьван?! Гъамуни рикI неда, фикирди - бейни. Гъам инсандин гуьгьуьлдиз янавай квак я.

Гаф мецелла - кьезил я, гаф рикIелла - къизил я. Гзаф рахадайдини гзаф кисдайди стхаяр я. Гзаф рахадайдан мез галатда, гзаф кисдайдан - бейни. Гзаф рахадайди кьел квачир хуьрек я, гзаф кисдайди - кьелен цел чранвай аш. Гзаф рахадайда, яб акалзавайдан кьил, гзаф кисдайда вичин патав гвайдан рикI тIapда. Лезгийрик и кьве жуьредин инсанарни ква, гьавиляй лезгияр ахварай аватдалди, абурун къуншийри чпин крар авуна куьтягьда. Гилан девирдин лезгийривай чпин бубайрин викIегьвал ийиз алакьнайтIа!

Акьул авачирди дидед чIал гумачир лезги хьиз я, гьавиляй анжах вич патал алахъзавайдани «халкь, халкь!» лугьун мумкин я. Лезгийриз садаз-садакай къведай хъел чпин душманрикай атанайтIа, абурукай гьар садакай са халис игит жедай, лезги халкьни садвилин мураддихъ агакьдай. Сиясат халкьдин яшайишдилай аслу я. Лезгидиз герекди са паб, вад аял, са кесиб кIвал ва са гъвечIи къуллугъ я. Дуьньядин сиясатдик пай кутун патал халкь вич сиясатдин майдандал хьана кIанда. Сиясатдин майдандал экъечIайда кесиб кIваликайни гъвечIи къуллугъдикай фикирдач, вичин халкьдикай фикирда. Лезгийри лугьузва: «Чунни халкь я, чазни, вирибуруз хьиз, барабар ихтиярар це!» Гьакимри лугьузва: «Бес чи лукIар вужар хьурай?!» Гьавиляй лезгияр чуруяр лацу хьанвай аялриз ухшар я. Лезгияр кьве патахъ пай хьунин тахсиркарар лезгияр я: абур адалатдин суфрадив геж агатна. Геж атай мугьманди вичин жибиндай неда, гьавиляй, гила хьайитIaни, халкьдин бахтунихъ къекъвена кIанда. Ада вичи халкь жагъурдайди туш. Бахт рикIин мурад патал женгера гъалиб хьунухь я. Пака жув бахт авай кас яз акваз кIанзаватIа, ам къе жагъура.

Хайи халкьдин тарих течидайди буьркьуь инсан хьиз я. Тарихни эдебият стхаяр я; сада лагь лугьуда, муькуьда лугьуда. Тарихди чирда, эдебиятди чирвилер виридаз пайда. Вичин тарихдикай хабар авачирди мамунихъ галай аял хьиз я. Тарих гуьзгуь я, фад-фад адаз килиг. Тарих миллет­дин лап чIехи тербиячи я. Вичин тарих якъин ва дериндай чир тахьанмаз, лезги халкьдивай дуьньядин халкьарин жергейра барабар чка кьаз жедач.

Яб це ва гъавурда акьукь: пачагьдихъ акьул тахьайла­, жемят адан чина акъвазда; пачагь зулумкар хьайила, жемят гъиле яракь кьуниз мажбур жеда; пачагь зайифди хьайи­­ла, уьлкве чкIида. Куьн чкIимир, лезгияр!

1992-йисан сентябрь-октябрь, KцIap шегьер

_____________________________________

«Ша, агата зав, кьегьалар, куьн къе…»

Зи азизбур

Зи стхаяр, зи вахар – зи азизбур,

Гьи чIавалди ксанваз куьн акъвазда?

Заманадин вилик хьана ажузбур,

Гьикьван куьне куь тIвар квевай яргъазда?

Вири халкьар, уях хьана, фидайла

Яшайишдин шуькIуь, какур рекьерай,

Вучиз куьне вилер мичIна, гуьдайла

Сарубугъда, жагъуриз чиг векьерай?

Ялна, куь мез акъуднава кIалхандай.

ЧIал намусни, гъейратни я инсандин.

Кис хьана куьн, рахаз тежез кьакьандай,

Язух чIугваз ферсуз гъвечIи хизандин.

Зи азизбур – зи стхаяр, зи вахар,

Къарагъ кIвачел, къе хьайитIан уях хьухь.

ЦIвагъа кIевиз, атIуй вилин ахвар зи.

Гур женгера зи арха, зи даях хьухь!

Ша, миллетар

Ша, миллетар, агата зи суфрадив,

Ам, лезгидин рикI хьиз, даим ахъа я.

КIантIа, фу не къавурмадив, шурвадив,

КIандатIа, аш зар синидиз экIягъа.

Стхавилел, дуствилелди гьамиша

Зи халкьдин тIвар хьайиди я винизди.

Зунни куьне, гьа за куьн хьиз, саймиша,

За хьиз, даим хъвер ая зи чинизди.

Зи дагъларни, зи багъларни, чуьллерни

Куьн паталди хуьзвайди я къурухда.

Зи вацIарни, булахарни, гьуьлерни

Куьн паталди душмандивай чуьнуьхда.

Тек са тIалаб ава захъ куьн паталди,

Зунни куьне стхадай яхъ, гьелбетда.

Зун галачиз катмир ацIай гаталди,

Эцигмир заз ракьун желе хелветда.

Фагьум гана заманадин гуьзгуьдиз,

Гьар са халкьди гьахълувилиз килигда.

Чир хьайитIа хаинвал са лезгидиз,

Ада тадиз гапурдал гъил эцигда.

Кьегьалар

Къе мад къекъвезва фикир яргъара,

Кьарай авачир зулун гарар хьиз.

Гьатзава вилин уькIуь юргъара,

Хабарсуз къвайи гатун харар хьиз.

А фикирри зун гьелекзава мад,

Сагьибсуз миллет рикIел гъваш лугьуз,

Яшайишдинни девирдин азад

Ишигълаван тир рекьел гъваш лугьуз.

Бес за вуч ийин? Душманар – пехъи!

Абуру сифте чIал хчунва чи.

Амалралди чун бурмишна векъи,

Алцурарнаваз, кIвал хчунва чи.

Ша, агата зав, кьегьалар, куьн къе,

Санал кIватI хьана, фикир сад ийин.

Адалат патал гьатнаваз рекье,

Пехъи душманрин вилер яд ийин.

Хъуьремир

Хъуьрезва вун за ваз авур теклифдал,

Яшайишдин парарикай хабарсуз,

Нагагь юкъуз ви уьмуьрдал алцифдай

Зулун-хъуьтIуьн гарарикай хабарсуз.

Зунни, вун хьиз, чIалахъ хьана эвелдай

Барабар я лагьай чIавуз миллетар.

Девирди чун кьуна цIуру хевелдай,

Кьисмет хьана элдиз зулум-зиллетар.

Килига, къе вилик физва вирибур,

Чпин миллет, чпин девлет тIарамиз.

Чан алач чал, ятIани къе дирибур,

ТахьайтIа, чун жедачир югъ гьарамиз.

Вун хъуьремир за ваз лагьай теклифдал,

Заз малум я, пашман я вун хелветда.

Вунни, зун хьиз, гьа теклифдал илифда,

Зи гъавурда акьур чIавуз, гьелбетда.

Хиялар

Гьей, хиялар, хиялар, зи рикIевай,

Хкаж хьухь куьн вили цавуз, къушар хьиз.

Шад хьухь даим, кIани тир яр рекьевай,

Гуьзлемишиз акъвазнавай рушар хьиз.

Алад вили лепе алай гьуьлерал,

Гимичидихъ галаз куьне суьгьбета.

Фена элкъуьгъ балугъчийрин гъилерал,

Зегьметчийриз алакьдайвал гьуьрмета.

Хкаж хьухь куьн цавун сирлу алемриз,

Гъетерални гафар твах зи саламдин.

Ахпа куьне дуьньядавай алимриз

Це шиирдин шуьрбетдикай илгьамдин.

Гьей, хиялар, ахпа хъша рикIиз зи,

Икьван иер чилерилай элкъвена.

Экв чукIура шаирвилин рекьиз зи,

Гьамишалугъ рагъни варз хьиз куькIуьна.

Инсан

Инсан ава – са вич патал кIвалахиз,

Гьа вичи нез, вичи вичел дамахдай.

Инсан ава – хизан патал алахъиз,

Хизан вичел, вич хизандал чIалахъдай.

Инсан ава – пехил жеда дагъларал,

Хьунухь кIани абур даим аскIанбур.

Инсан ава – хар ракъурда багъларал,

Хьунухь кIани къени тарар хъалхъамбур.

Инсан ава – фикиррикай селлердай,

Фирай лугьуз абур элдин хуьлерай.

Инсан ава – мухарикай къуьлердай,

Фуан атир гьатрай лугьуз хуьрера.

Инсан ава – эл паталди кIвалахна,

Виш йисарал вичин суракь ракъурай.

Инсан ава – вичел дуьнья чIалахъна,

Са паюнал яру пайдах алкIурай.

Кьегьал кас

Рази тирди заманадин мизанрал

Жеда даим межлисрани кефера.

Зар-хараяр къуриз вичин хизанрал,

Женнет базар твада кIвале йифера.

Рази тирда заманадин гьахъарал

Са чIавузни девирдикай синихдач.

Фида а кас даим ширин ахварал,

АлакьайтIа, чат кепекни чуьнуьхда.

Агъазвайда адалатдихъ девирдин

Адалатсуз кардин гардан ахъайдач.

Ван хьайила агьузарлу шиирдин,

Гьич къеняйни са тIимил кьван агь-вайдач.

Эллер вири гур женгериз тухудач

Азадвилин дидардавай хиялри.

ЦIелхемрикай цIаяр жеда лугьуда

Гележегдин сирер кьатIай кьегьалри.

Кесиб къунши

Зи къуншидал са кас ала, лукI хьтин,

Вич ханарин несилдикай я лугьуз.

Са кIвал ава адахъ, пехърен муг хьтин,

Тежер, валлагь, мугьман касдиз ша лугьуз.

Фу хьайила, калтугда ам къафундихъ,

ЦIийи шалвар агакьзавач перемдив.

Тек са манат гуда хипен руфундихъ,

Аяларни кьаз тазва гьакI веремдив.

Наразивал авач адан хиялда,

Женгеривай яргъаз жеда гьамиша.

Зун хьтинбур кьада женжел аялдай,

Лугьуз жуван ширин чандиз къиймиша.

Къизилдалди алцумзава гьар са затI

Къизилдин ранг такур кесиб фагъирди.

Туна вилик цуру тугъни цуькIуьн чIатI,

Гьатзава ам хуш хиялрин суьгьуьрда.

Кьуьд

Атана кьуьд аяз галаз, къай галаз,

Вич сифте яз атай касдай гьисабна.

Кар авуна ялав галаз, цIай галаз,

ТIебиатдин жигер кана, кабабна.

Амма ада фейи йисар кьатIанач,

Вич хьтинбур виш йисара къвез фена,

Динж акъвазнач, женжелвилер атIанач,

Ам гьар са затI вилиз акур нез фена.

Тарар-тамар ада тамам кьецIилна,

Къай кутуна, мекь кутуна кIвалера,

Вири вичин гьуьрмет ада кьезилна,

Ам пис хьана яшайишдин вилера.

Муьжуьд югъ я, кьуьлерзава живеди,

КIунтIар хьтин маргъалар чи рекьел гъиз.

АкI жезва заз рехи хьанвай деведи

КIурарзава, жегьилвилер рикIел гъиз.

Жив

Жив къвана къе такъвай хьтин хъуьтIуьзни,

Кеф авурай туькIвейбуру кIвалахар.

Жезвач завай зи бахтариз куьтIизни,

Авунваз жув гележегдин чIалахъар.

Жив къвана къе, чайгъун галаз, къай галаз,

Кесиббурун рикIе тIурфан къугъвана.

И живедихъ аман галач, вай гала,

Ада кIвалин чIуру чIере чухвана.

Жив къвана къе, гьич садрани такъвайд хьиз

Чилни, цавни какадарна, садарна,

Чун амукьна, яван лаваш жакьвайд хьиз,

Чи душманар, гьамиша хьиз, шадарна.

Жив къвана къе, такъвай хьтин садрани,

Зи суфрадал алайди шур-картуф я,

Эхдач и жив байкъушдини, катрани,

Дуьгуь амач, кIатIавайди сулуф я.

Шаир

Ава чахъни гьар жуьредин шаирар,

Рангар хьтин цуьквераллай гатфарин.

Теснифда гагь пис, гагь хъсан шиирар,

Атир галай яшайишдин гафарин.

Сада уьмуьр кьада гурлу мехъер яз,

Садаз яс хьиз аквада ам хелветда,

Сада йисар гьисабда ал эквер яз,

Сада яргъал хуш аямрин суьгьбетда.

Халис шаир яшайишдин нефес я,

Килигзавай гележегдин вилерай.

Халис шаир заманадин нефес я,

Тухудай эл анжах вичин гелерай.

Ярумчухдав агъзур жуьре фенд жеда,

Йикъа садра кIвенкIиз вичин хиялдал.

Зун гьа халис шаир касдал бенд жеда,

Диде кьару жедай жуьре аялдал.

Гуьзел

НиштIер хьиз хци, цкIлам кьван чими

Вилералди вун килигна, гуьзел,

Чирна муьгьуьббат тирди заз кимид,

Зал ашкъидин цIай илигна, гуьзел.

А цIаяри зи кана рикI-жигер,

ЦкIламрал якIар кудай тегьерда.

Вак инсаф-мирвет квачирни мегер,

Вучиз туна зун яргъал сеферда?

Лагь, вун гьи хуьряй жагъуррай къе за,

Гьи шегьерда за ви суракь ийин?

Мергьямат яни, тахьайтIа жаза -

Хъилекай жуваз за яракь ийин.

Хъелни гьатзавач къе зи гуьгьуьлда,

Ана ашкъидин цIаяр къугъвазва.

ГьакI тирвиляйни кефи сугъулда,

Сугъул кефийра къаяр къугъвазва.

Дявекарар

За вуч лугьун яшайишдин кIвалахриз,

Кьиляй-кьилиз чIуру хьанвай мизанар?

Алахъда вун женнетдал зун чIалахъриз,

Чанда аваз зи аксина гъерезар.

А гъерезра нефсер ава вун патал

Куьтягь тежер, гамишдинни деведин.

И дуьньяда жув зурба кас хьун патал

Къулара цIай ийизва на дяведин.

Гьа дявеяр экъечIда ви эхирдиз,

Дуьнья я им, шумуд гьаким къвез фейи.

Бахтари вун хъияда гьа нехирдиз,

Эхиратдин рагъул ятар хъваз фейи.

Зун лагьайтIа, гъвечIи халкьдин шаир я,

Жуван хатIар таз кIанзавай аямрал.

Захъ авайди хуш манини шиир я,

Абур къведач ви дявекар къадамрал.

Суна

Ингье суна килигна зи вилериз,

Жейранди хьиз, авчи акур яргъалай.

Къурбанд жечни шаир адан гелериз,

Кьилел даим муьгьуьббатдин юргъ алай.

Кьве келима хъуьрез-хъуьрез рахана,

Зи виликай, къвед хьиз, а руш алатна.

Ада зи руьгь вичихъ галаз тухвана,

Кьуьзуь кьиляй зани жизви гъалатIна.

Герек за жув кьуна кIандай заландиз,

Кьве келима, такIанз, жаваб хгана.

Вил вегьена жуван цIуру паландиз,

Къвазна кIандай, гьич саламни тагана.

Къе тахсирар кьазва жуван хиве за,

Алцурна зун а сунадин вилери.

Ирид югъ я ризкьи твазвач сиве за,

Къекъвез адан кьезил, назик гелера.

Лезги тарих

Чирагъ-кIеле дагъдин кукIвал алкIана,

Азадвилин рекьиз тежер хиял хьиз.

Кьилни адан вили цавухъ галкIанва,

Ахварава ам, са куьрпе аял хьиз.

Бармак-дагъни ала адан къуншидал,

Къаравулда акъвазнавай аскер хьиз.

Лезги тарих гьалт тавурай нашидал,

Ам гатада ада вичин нуькер хьиз.

Лезги чилин тарих чидай кас авач,

Ам гьатнава идан-адан гъилера.

И аямда чи гафарихъ мас авач,

Къундармаяр сухзава чи вилера.

Амма, чида, девир къведа, гьелбетда,

Лезги тарих вичин халкьдив ахгакьда,

ЧIурна мурад викIегьдаказ небгетдан,

Чалай, шаксуз, адалат хуьз алакьда.

Лезги чилин тегьер

Накь са мани лагьана заз дустуни,

Дегь девирдин лишан галай, гел галай.

Яб гайила, цIай кьуна зи къастуни,

Адахъ вацIун къуват галай, сел галай.

А къуватди кьуна зунни луварал,

Хиял фена виш йисарин гелерай.

А къуватди хкажна зун цаварал,

Чил акуна заз манидин вилерай.

А чилерал гьижран алай, гъам алай,

Шадвилерни какахьнаваз арадик.

А чилерал виш рангунин гам алай,

ЭкIя хьанваз ал ракъинин нурарик.

А нурари кьунва хуьрер, шегьерар,

Дерейрани, тепейрани гьай хьана.

Амма тек са лезги чилин тегьерар

Акуна заз кьве терефдик пай хьана.

Уьмуьрар

Уьмуьр я ман, дагъдин какур рехъ хьтин,

Бязибуруз бахтар вири гуда хьи.

Уьмуьр я ман, кесиб хуьруьн регъв хьтин,

Бязибурни кьиляй-кьилиз куда хьи.

Зун пехил туш бахтар авай ксарал,

Заз хьаначтIан, къуй гьабуруз кьисметрай.

Са касдинни мехъер тефий ясарал,

Чарадан кIвал чIурун тахьуй ниятра.

Пагьливанни зайифарда гъуьнтIуьни,

Ажалдин вахт гагь юкъуз, гагь йифиз я.

Уьмуьр я ман, зидини туш видини,

Жегьилар къвез, кьуьзуьбурни хъфиз я.

"Лезги газетдин" 2026-йисан 32-нумрадай.