Белоруссиядин меркез Минск шегьерда халкьдин шаир Янка Купаладин са шиир ва дуьньядин виш чIалаз авунвай адан таржумайрин ктаб акъудиз гьазур хьанва. Абурук лезги чIалаз авунвай таржумани акатда. Ингье таржумачи Имара Мурадовади чи чIалаз элкъуьрнавай Белоруссиядин классикдин шиирди гьикI ванзаватIа.

Беларуссрин партизанриз

Партизанар, партизанар,
Рухваяр беларуссрин!
Илига душманрал мурдар,
ТукIукI а лянетлу лужар,
ЧIулав лужар дявекаррин.

ХарапIайрални сурарал,
Гелерал рчанвай ивиди,
Къаргъади эверуй тIуьнрал
Къаргъайриз, чпин кур кIарабрал,
Тухардайвал садакьади.

Къуй а Гитлеран-набутдин
РикI къаргъайриз тух ем хьурай.
Акурай къудрат чи халкьдин,
Пехъи жинсиниз ягъийрин,
Партизанар, куь кьисасдай!

Нясди халкьдиз гъана зулум,
Тергиз дишегьлини аял.
Ая абурун кьилиз къалум,
Ая уьмуьрдикай магьрум
Алахьай югъ чIурай дажал.

Партизанар, партизанар,
Рухваяр беларуссрин!
Илига душманрал мурдар,
ТукIукI а лянетлу лужар,
ЧIулав лужар дявекаррин.

Зи гаф я квез: гъалиб жеда,
Хъжеда куь йикъар бахтлу!
Лавгъа нясрин эхир къведа,
Гуьллейрин цIу секинарда
Тамара чеб, гьар са къанлу.

Зинданра шел чи аялрин,
Бубайрин кьуьзуь агьузар.
Чуьлда ялавда къуьл кьилин,
Адан суза: «ИкI кьиле фин
Гьикьван хьурай, я ягъияр?»

Вахарин-стхайрин играми,
Кайи техилрин, кIвалерин
Хьухь куьн къудратлу кьисасчи,
Къимет хьуй ивидай - иви,
Тамара бул хьурай сурар!

Партизанар, партизанар,
Рухваяр беларуссрин!
Илига душманрал мурдар,
ТукIукI а лянетлу лужар,
ЧIулав лужар дявекаррин.

Квез архани я, даяхни
Белорус халкь гьар камуна.
Жемир квез гьич са къурхуни,
Партизанрин гьахъ рекьери
Гъалибвилихъ куьн тухуда.

Михь хъийида чна чиркеркай
Чилерни, ятарни цавар.
Фашист кицIиз гьич такурай
Михьи цавук цуькведавай
Гьам чи никIер, гьам чи тамар.

Партизанар, партизанар,
Рухваяр беларуссрин!
Илига душманрал мурдар,
ТукIукI а лянетлу лужар,
ЧIулав лужар дявекаррин.
1941