Вичин ери-бине Ахцегь райондин Ухулрин  хуьряй тир Саидан руш Тамила Хуршидовадихъ галаз чун Да­гъустандин педуниверситетда кьиле фейи СтIал Сулейманаз талукьарнавай илимдин конференциядал таниш хьанай. Анлай кьулухъ зун и милайим дишегьлидихъ галаз мад са шумуд мярекатдал хьана. Ада чи библиотекада кьиле физвай лезги литературадиз талукь мярекатра гьамиша иштиракзава.

Тамила Хуршидовадин сад лагьай ктаб «Кварцин нур» 2022-йисуз «Мавел» издательствода чапдай акъатна. 2020-йисуз ам «Лезги газетдин» премиядиз ва дипломдиз лайихлу хьана, 2024-йисалай Россиядин писателрин союздин член я.

Тамила Хуршидовадин яратми­шу­нар­ «Лезги газетда», Азербайжанда акъатза­вай «Самур» газетда, «Кард», «Самур»­, «Да­гъустандин дишегьли» журналра, гьакI­ни «Вологодский лад», Саратов­да акъат­завай «Волга XXl век» журналра, уртах кIва­тIалра чапнава. Мадни кIелзавайбурув адан «Дидедин къужах», Вологда шегьердай тир шаир Алла Касецкаядихъ галаз уртах, урус ва лезги чIаларал «Объединяя сердца» («РикIер галкIуриз») ктабар агакьнава.

Ухулрин хуьр арандиз, Мегьарамд­хуьруьн райондин ЦIийихуьруьз куьч жедайла, Тамиладин анжах кьуд йис тир. Адавай гьеле бегьемдиз кьатIуз хьанвачир дагъларин кьакьанвал, яйлахрин иервал, цуькверин атир, булахрин цин дад. Белки, гьабурухъ цIи­­гел яз амукьайвиляй я жеди адан рикIе дигмиш хьайиди, адан къелемдикай хкатайди хайи хуьруькай, дагъларикай, анин инсанрикай шиирарни макъалаяр.

Адан яратмишунрин тематика жуь­реба-жуьре я. Алай аямда дуьньяда кьиле физвай вакъиайри ам секиндиз тазвач. Адаз СВО-дин иштаракчийриз бахшнавай шиирарни ава. «Лезги офицер» гьабурукай я:

ЦIай кьуна кузвайла Херсонни Донбасс,
Куьмекдиз фена вун, хьанач вун яргъаз.
Субутна тирди вун Шарвилидин кас,
Ватанпересвилин рикIеваз гьиссер,
Женгиник экечIна лезги офицер!

Шаирдин чIалариз маниярни туь­кIуьр­нава: «Ислягьвал хуьх», «Дидедин къужах», «Муаллим», «Кьве бахтлу цуьк», «Дуьнья», «ЧIуру хабар». Адахъ аялар патал кхьенвай эсерарни ава. Абурукай яз, «Рухвайриз» шиирда ада лугьузва:

Ахъай мийир туьхкIуьр тежер гъалатIар,
Сабур, абур хьурай квев гвай алатар,
Кьилин макьсад тахьурай куь манатар.
Квев нашивал агуд мийир, рухваяр.

Дишегьли шаирдиз хас тирвал, муь­гьуьббатдин лирикадини гегьенш чка кьазва Тамила Хуршидовадин яратмишунра.

За гъалатIриз ганач майдан,
ХьанатIани зи чан гьалдан.
Ажуз хьана кIирнач гардан,
За асланвал къене кьуна.

Зун туьгьметри гатай чIавуз,
Кьил яцIара гьатай чIавуз,
РикI мецери атIай чIавуз
За пашманвал гине кьуна.

Пеше хьана ягъун цIенкьер,
Дар ийиз заз шегьре рекьер,
Элкъуьрдайла чIуру регъвер,
За инсанвал вине кьуна.

Адаз мукьва ва гьуьрметлу ксариз бахшнавай са кьадар шиирарни ава. ИкI, вичиз шииратдин сирерай кьил акъудиз чирай, насигьатчи хьайи яшлу шаир ва алим Фейзудин Нагъиевахъ элкъвена, ада лугьузва:

Тарихар галкIурун пакадихъ
Къаст я ам Фейзудин бубадин.
Къула цIай, чимивал акадихъ
Гьар са лезги хуьруьн-убадин!

Шаирди вичин хайи хуьр Ухулрал да­мах­зава, ам харапIайриз элкъуьнин гьайиф чIуг­вазва. Умударни ава адан рикIе хуьрел чан хтунин:

Ви веледрин гала вахъ гъил,
Вун абуру тадач сефил,
Бубайрин гел аламай чил,
Чан хкведа вал, Ухулар.

Шаирдин яратмишунра гегьенш чка дуст­вилин темади кьазва. Ада вичин дуст урус шаир Алла Касецкаядиз ихьтин цIарар бахш­нава:

Къе яргъарай, жагъурна вахт,
Заз салам гана,
Атана зи къелемдин вах,
Заз илгьам гъана.

Дегиш хьана кIвалин гьава,
Рагъ аватай хьиз.
Заз акI я хьи, Ахматова
Чиниз атай хьиз.

Зун бахтлу я, акуна дуст,
Куьк я кефияр.
 Куьруьди я Алладин туст:
«Сагърай лезгияр!»

Пехъи нефсер алахъзава
Дуьнья гине кьаз.
Амма чна кIвалахзава,
Дуствал вине кьаз.

Хайи чиликай, халкьдин къайгъуйрикайни тIалрикай-квалрикай, зегьметкеш инсанрикай керчек, михьи гьиссеривди кхьизвай Тамила Хуршидовадин шиирар кIелиз хуш къведайбур я. Шаир яратмишунрин яцIа ава. Адахъ инлай кьулухъни агалкьунар хьун чи мурад я.

Секинат Мусаева, Р. Гьамзатован тIварцIихъ галай ­ктабханадин къуллугъчи