Бригадирдин суьгьбет

(«Экв яргъай аквада» повестдай чIук)

Зун дяведин четин вахтара чи хуьре чуьлдин бригадир хьана. Виликрай чи хуьре пуд бригада авай. Зал гьалтайла, сад хъувунай. Яшар хьанвай заз бригадирвал авун четин тир. Пуда, кьуда авуна кIанзавай кIвалах са касди ийиз­ хьайи­ла, четин жедачни? А четинви­ле­рикай, зегьметрикай рахадай вахт тушир. Ватандин винел цIайни ялав, тIур­фанни агъу гваз къвезвай пехъи душмандин аксина, чпин чанар гьайиф­ те­къвез, йиф-югъ ахвар тийиз, женг чIуг­вазвай чи кьегьалриз регьят тирни бес?

Гад кIватI хъувун гьарай я, чан хва! Вични а дяведин йисара, куьмекар авачирла. Гатуз юрфар чими тавурдавай хъуьтIуьз абур чими ийиз жедач. Са чIиб чка бушдиз, са кьал векь чуьлда туна виже къвезвачир. Техил цана кIандай. Техилдин гьар са твар а вахтара гьам фронт патал, гьамни далу патаз къизилдай тир. Мезредай са твар магьсул артух къачун хьайила, ам душмандин пеле акьадай гуьл­ле жезвай. Руфуна бегьем фу авачир дишегьлиярни жегьилар никIиз-векьиз акъудна кIанзавай. Зун, экв тахьанмаз, са шумудан гьаятдал фидай. Фад кIвалахал акъудна кIанзавай.

Инсанар вири сад хьиз жедач. Садаз, са гаф лагьайла, гьасятда хъел къведа. Масадаз пудра-кьудра лагьана кIанда. Гьар садахъ галаз рахадай саягъ чир хьана кIанзавай. Аман-минетдай. Амма за ваз лугьун: инсан­рихъ галаз кIвалахун, абурун виридан­ чIал чир хьун итимвал я. Тариф­ авун патал са сеферда фикирна кIан­датIа, туьгьмет авун патал кьведра фикир ая лугьузва. Ажеб дуьз гафар я ибур. Ве­къиз­ рахун гьикьван заз кIан­­дачиртIани, бязи вахтара мажбур­ жедай. ЯтIани за багъишламишун­ тIа­лаб­дай. Четин вахтара эвела жува­ масабуруз чешне къалурна кIанда. Тек са жува ваъ, жуван хизандини. Зи паб йиф-югъ маларин тевледал хьанай. Сусан­ гъвечIи аялрин аявал авунни чна къаридин хивез вегьенвай. Сифтени-сиф­те за зи хцин сусаз векь ягъиз, цан цаз чирнай. Чи хуьре дишегьлийрикай сифте куьтендин дес­текни дергес гъиле кьурди зи свас хьана. Адалай маса дишегьлийрини чешне къачунай. Са хвал дуьз тухвайтIа, кьвед па­тахъ тухуз, цIа­рар ийиз, цанар цадай абуру. Дишегьлийри дергес терсина кьуна ядай векьерикай мад вун рахамир. За йикъа са шумудра гагь векь язавайбурун, гагь цан цазвайбурун патав чукурдай. Гьикьван четинвилер хьанайтIани, абур вердишарнай. Къвез-къвез кар юнда гьатиз башламишна. Са бязи дишегьлийри итимрилай хъсандиз цан цаз, векь ягъиз хьана.

Чи кьушунри фронтда душман­ барбатIзавай. Абур вилик физ хьана. Далу пата чна чан эцигна кIвалахзавай. Фронтни далу пад вилик физва лугьуз, радиодай гудай хабарри чак къуват кутазвай.

"Лезги газетдин" 2026-йисан 25-нумрадай