Стха завай къакъатна

Экуь дуьнья хьанва мичIи,

Гуьгьуьл - сефил, рикI я ичIи,

Пашман хьанва хизан вири,

Стха завай къакъатна.

Кими жезвач вилин накъвар,

ГьикI эхда за и залан пар?

Лувар хана, рикI хьана тIар,

Стха завай къакъатна.

Гъиле ава стхад шикил,

Зи дерт жезвач кIусни кьезил,

И дуьньядихъ галамаз вил,

Стха завай къакъатна.

Стхадин тIвар ала мецел,

Ам галачиз тек я чилел,

Экуь къастар авай рикIе,

Стха завай къакъатна.

Аллагьди ваз гурай рагьмет,

Кьисмет хьурай ваз пак женнет,

РикIе хуьда за ви суьрет,

Стха завай къакъатна.

"Лезги газетдин" 2020-йисан 16-нумрадай.