Энжем Веледов
Веледов Энжем Азеран хва 1986-йисан 24-июлдиз Азербайжан Республикадин КцIар райондин Манкъулид хуьре дидедиз хьана. Юкьван мектеб акьалтIарна, Азербайжандин университетдин «Фармацевтика» факультетда кIелна. Алай вахтунда «Зейтун» аптекада кIвалахзава.
Лезги ва азербайжан чIаларал шиирар кхьизвай адан эсерар «Самур» газетдиз акъатна. Э. Веледова гьакIни лезги ва азербайжанви шаиррин шиирар, иер ванцелди кIелиз, интернетдин сайтра эцигзава.
КIаниди
Гатфар кьиляй акъатай шагьвар хьтин,
Женнет багъдиз ахъа жезвай вар хьтин,
Ашкъид тарцел чранавай бар хьтин,
ЧIарар расу, вилер къацу кIани яр.
Лацу чиниз нурар гузвай а тIехвер,
Яр янавай цавар хьтин мили хъвер,
Вун гайидаз шукур хьурай икI иер,
ЧIарар расу, вилер къацу кIани яр.
Яр патав гвай куьз герек я заз лукьман,
Адан кIуьгьуь гафар дердиниз дарман,
Зи уьмуьрдиз эбеди яз хьуй мугьман,
ЧIарар расу, вилер къацу кIани яр.
ХъуьтIуьн рангар
Регъуьхбан хьиз, лацу хьанва тамни чил,
Мад сафунай жив язава цавари.
Къал галай саврухри къачузавач гъил,
МуркIуцI кьунва чIутхваррини къавари.
Тарал алай нуькIеризни лифериз,
Гишинзава, затI жагъизвач кьифериз,
Кумада вил ахварзавай севериз
Лайлай язава мекьи йифиз къаяри.
Вирер, вацIар, алмас къаш хьиз, муркIада,
Хуьруьнвияр ката-калтуг юргъада,
Жув живедин гьатай чIавуз юртада
Жакь-жакьарда мекьи хьанвай сарари.
Гьар са куьниз авайди хьиз эхирар,
ХъуьтIуьн чIавуз рехиз акваз жигъирар.
ТIебиатди къалурда чаз суьгьуьрар,
Чими гатфар гъида Яран сувари.
Мез ава
Мез ава хьи, херда рикIел, гапурд хьиз,
РикI тIарарда, саки кьве чIук авурд хьиз.
Мез ава хьи, гъуьлягъ мукай акъудда,
РикIе авай вири дердер алудда.
Мез ава хьи, ам агъу я, туькьуьл я,
Ахьтин рикIе хияларни кагьул я.
Мез ава хьи, рикI ашкъидив ацIурда,
ХъуьтIуьн цикIиз дагъда муркIар цIурурда.
Мез ава хьи, ислягьвилин лишан я,
Сиве ширин мез авайди инсан я…
Мектеб
Хьирхьам акьалтнавай а къванцин цлар
Гьикьван мукьва ятIа, чими я рикIиз.
Залай алат тийир рикIел хкунар,
Вахтар фейитIани, хкведач гъилиз.
Ви гьар са пата зи кIвачин гелер я,
Фена ви къужахда аял чIавар зи.
И йикъар за «гвена», гузвай «бегьер» я,
Вахъ галкIана ама рикIин багъар зи.
МефтIеда эбеди чка кьунва зи
РакIарин чIигъ-пIигъди, киреждин ялци.
Вун са эвлиянни ужагъ, пIир я зи,
Руьгьдиз лап мукьва я зи рикIин мани...
"Лезги газетдин" 2025-йисан 30-нумрадай
_________________________________
Дуьнья
Амач гила дуьньядин сифте гьалар,
Билбиларни рахазмач ширин чIалар,
Алукьнава кьуд пата дяве, къалар,
БицIекрикай тахтуниз ийиз чIатха1 –
Акъатнава и дуьнья цIарцIяй, стха.
Агъу хьанва, рахазмач мецер ширин,
Къайи хьанва рагъни, экв гузмач дерин,
Алцифзавач рагъул хьайи ятар вирин,
ЛаматI тир ксариз хьана къалин арха –
Акъатнава и дуьнья цIарцIяй, стха.
Гадарна чIал, квадарна динни иман,
Адаман хва кьисметдиз физва гъугъван,
Хъенерни чIехи хьанва аскIан суван,
Ивирривай акъвазна къе чун яргъа –
Акъатнава и дуьнья цIарцIяй, стха.
Жувакай са гъвечIи ихтилат
Кхьейдакай хкатзавай гьар са цIар
Зи руьгьдавай секин тежер тIурфан я!
РикIни чими – гаф чразвай саки хьар,
Заз шиирар хайиди хьиз масан я!
Руьгьдин экв-цIай тIям хьана зи танда,
ЦIар яна хьиз зи ивида, зи чанда,
КIел тIавурай шиирдикай яванда,
Гьар са шиир зи къилихдин лишан я.
Устад Эйваз, физвай рехъни Марвар я,
Шиирарни чIур фагьумриз часпар я,
Гьар са кукIуш зи дуьньяда са тIвар я,
Хайи Шагьсув Эверестдлай кьакьан я.
За кхьида къе руьгьдиз, рикIиз хуш цIарар,
Гьар мефтIеди иливардай нуш цIарар
Яргъал кьада чилаф цIарар, буш цIарар,
Зи гьар шиир чIехи тIварцIиз игьсан я.
Вун хьтин са усалдин!
Икрам тийиз чIехидаз, я гъвечIидаз,
Харчи я сив, кицI хьиз рахаз виридаз,
Вучин за ваз, акьулдикай кьеридаз?
ТуьргьуьцI2 атIуй вун хьтин са усалдин!
Паркьулдикай ийизва чаз афарар,
Агакьариз идкай-адаз хабарар,
Къачуз авай нефесни кваз тапарар,
ТуьргьуьцI атIуй вун хьтин са усалдин!
Йифиз-юкъуз ви цацид3 ван зи кьиле,
Акьадач жал са еке кIаш ви пеле,
Квахьна фий, алатрай чалай и чиле,
ТуьргьуьцI атIуй вун хьтин са усалдин!
Акунвайди, ахъайна вил, хебни кьар,
Ацукьунал-къарагъунал туш пайгар,
Нисинилай югъ акунвай бахтавар,
ТуьргьуьцI атIуй вун хьтин са усалдин!
Шур недай кьван хьанава сив-мезни хер,
Гьай-гьуй ийиз инсанариз гуз эвер,
Гьайван вуж я, инсан ятIа вун эгер,
ТIуьргьуьцI атIуй вун хьтин са усалдин!
Виридаз хьиз, вазни ама тIимил чIав,
Аквазва заз, галамач кьил, фенва къав,
Пехъи хьана, ягъиз тахьуй на кIурув цав,
ТуьргьуьцI атIуй вун хьтин са усалдин!
Агъу жемир пара туькьуьл, хьухь ширин,
МефтI юзура, ая фагьум на дерин,
Тфу тахьуй ви сурал вири эллерин,
ТуьргьуьцI атIуй вун хьтин са усалдин!
________________________
1 ЧIатха – къалхан.
2 ТуьргьуьцI – нефес (нугъатдин гаф).
3 Цаци – къуш.
"Лезги газетдин" 2026-йисан 31-нумрадай