Фашистри Ватандал вегьейла, кьурагьви Абдуселим Назаралиев гуьгьуьллувилелди фронтдиз фена.

Адан фронтдин рекьикай са дивизияда къуллугъ авур районэгьли Магьарамов Рамазана ва Москвадин областдин Воскресенск шегьердин агьали, военный фельдшер Иван Хорешева рикIел хканай:

“Экуьнин ярар хкатзавай вахт тир. Лейтенант Федорова регьбервал гузвай чи батальондин аскерар кIеве гьатна, хейлинбур хкатнавай. Гьа и арада чи окопдиз старший политрук, комиссар Абдуселим Назаралиев акъатна. Арадал атанвай гьалдиз къимет гана, ада сагъзамай, кьезил хирер хьанвай аскерар кIватIна, чи вилик акъвазнавай везифа сад — душман тепедал ахъай тавун — тирдакай лагьана ва, вич кIвенкIве гьатна, чун гьужумдиз къарагъарна.

Чи патай ихьтин уьтквемвал гуьзлемиш тавур немсер кьулухъ катуниз мажбур хьана. Тепени хвена.

Дивизиядин комиссар Назаралиеван ва лейтенант Федорован лайихлувилерни гьукуматди шабагьралди къейдна, Абдуселим Назаралиеваз Яру Гъетрен орден гана…”.

«Лезги газет»