Ихьтин лишандик кваз мукьвара Россиядин ФСИН (Федеральная служба исполнения наказаний) Дагъустанда авай управленидин 1-нумрадин силисдин изоляторда (СИЗО) дустагънавай дишегьлийриз руьгьдинни ахлакьдин тербия ва яшайишдин рекьяй куьмек гуниз талукьарнавай мярекат кьиле тухвана. СИЗО-дин тербиядин кIвалахдин дестедин теклифдалди иниз гражданвилин обществодин институтрин ва Дагъустандин Муфтиятдин векилар атанвай. Кьилди къачуртIа, абурун арада авай: Дагъустандин дешегьлийрин союздин председатель Хасайбат Валиева, Госдумадин депутатдин куьмекчи Мадина Ибрагьимова, Махачкъаладин жегьилрин парламентдин депутат Сафина Аркалаева, Муфтиятдин просвещенидин отделдин къуллугъчи Жамиля Мегьамедова.
Къейд авун лазим я хьи, азадвиликай магьрумнавай ксариз чпин ихтиярар чир хьунихъ элкъуьрнавай ва абурун руьгьдинни ахлакьдин тербиялувал хкажун патал жемиятдинни диндин тешкилатрин иштираквал аваз серенжемар датIана кьиле тухузва.
Мугьманри азадвиликай магьрумнавай дишегьлийрихъ галаз хизандин ивирар, алакъаяр хуьникай, абурун къиметлувиликай, дишегьлидин виликамаз тайинарнавай виниз тир везифадикай — дидевиликай, гьакIни алай аямда дишегьлидин роль гьикI дегиш жезватIа, суьгьбетарна. Жамиля Мегьамедовади асиррилай асирралди дишегьлидин къилихдин асул бине яз гьисабзавай регьимлувал, сабурлувал, камаллувал квадар тавунин важиблувиликай лагьана. Гьатта дишегьлидиз четин и макъамдани адалай кIвалин къул хуьз ва багърияр патал руьгьдинни ахлакьдин даях яз амукьиз жезвайди къейдна.
Гьа са вахтунда мугьманри чпивай гьихьтин куьмекар гуз жедатIа, гьадакайни лагьана. ИкI, Хасайбат Валиева дустагъдай экъечIнавайбурун яшайишдин адаптациядин месэлайрикай, кьилди къачуртIа, образование къачудай мумкинвиликай, кIвалахал акъвазун патал куьмекдикай суьгьбетна. Азадвиликай магьрумнавай дишегьлийриз чпин ихтиярар чир хьунихъ абурун гележег патал еке метлеб авайди къейдна.
Гуьруьш ихтибарлувилин суьгьбетдин тегьерда кьиле фена. Дишегьлийри диндин къайдайриз, яшайишдин месэлайриз талукь тир суалар гана.
СИЗО-дин администрацияди къейдзавайвал, жуван ихтиярар ва къимет эцигдай уьлчмеяр чир хьуни дустагънавай дишегьлийриз психикадинни гьиссерин гьал хъсанаруниз, закондиз ва общественный къайдайриз гьуьрмет авун арадал гъуниз куьмекзава. Мадни ихьтин серенжемри дустагънавайбурун кьилин фикир дуьз рекьел хтунал, жуван низам-къайда хъсан патахъ дегишарунал желбдай мумкинвал гузва.
Регина Семедова
