Ахцегьрин 1-нумрадин школадин – 165 йис

Юбилейдин къаршидиз чна са жерге материалар ганай. Ингье и югъ алукьна. Ахцегьрин СтIал Сулейманан тIварцIихъ галай 1-нумрадин школадин 165 йис! Им гьакIан адетдин са юбилей туш, Дагъус­танда, гьатта  Кеферпатан Кавказда хуьруьн чкада гьеле 1861-йисан 26-сентябрдиз ачухай светский 1 школадиз, адан тарихдиз, бине эцигайбуруз, адетриз, муаллимринни аялрин коллективриз кье­тIен гьуьрметун я.

Девирдин истемишунрив кьадайвал цIийикIа туькIуьр хъувунвай школадин гьаят транспарантрив, гьар жуьре рангарин шараривни цуькверив безетмишнава. Райондин образованидин ветеранар, кьиле Ахцегь раймуниципалитетдин регьбер Абдул-Керим Палчаев аваз багьа мугьманар пионерри музыкадалди ва цуькверивди пара хушдаказ къаршиламишзава.

Школадин директор Султанагъа Мисиевади абуруз дараматдин фойедиз теклифзава. Ина Ахцегьрин машгьур музейдин ва культурадинни искусствойрин музейдин куьмекдалди шикилринни надир экспонатрин девлетлу экспозиция, гьакI кьилдин этноуголок ачухнава. Абурай школадин бине эцигай 1861-йисалай къенин йикъалди мектебдин тарих ва ам вилик финин рехъ аквазва.

Мярекатдин межлис сиве-сивди ацIанвай актовый залда къурмишнава. Сегьне Рагьимат Гьажиевадин тIварцIихъ галай музшколадин аялрин хорди ачухзава. Тебрикдин гаф Абдул-Керим Палчаева лагьана.

– Гьуьрметлу муаллимар, аялар, мугьманар! Ахцегьар ата-бубайрилай инихъ чирвилеринни илимдин рекьяй тафаватлу я. Гьеле Октябрдин  инкъилабдилай вилик ина чпихъ медресаярни галай 18 мискIин авай. Анра Мирза Али, Мегьарам эфенди хьтин машгьур алимри диндинбурухъ галаз санал светский тарсарни гузвай. Абурун гъиликай гьеле гьа чIавуз цIудралди алимарни гьар жуьре пешекарар хкатна. Гьавиляй Ахцегьа Дагъустандин, гьатта Кеферпатан Кавказдин дережада хуьруьн чкадин светский сифте школа кардик акатун дуьшуьшдин кар тушир. Гьакъикъатда и школа савадлу ксар, гележегдин зурба алимарни пешекарар арадал гъидай халис чатуниз (кузница) элкъвена. Инай чпин тIварар вири уьлкведин тарихда тур, Ахцегьар вири дуьньядиз машгьур авур баркаллу рухваярни рушар Пир-Али ва Видади Эмировар, Нажмудин Самурский, Къазимегьамед Агъасиев, Советрин Союздин Игит Гьазрет Алиев, Аскар Сарыджа, Рагьимат Гьажиева, Шагь-Эмир Мурадов, Саимат Ферзалиева, Къияс Межидов, Москвада ЧIехи театрдин балерина Алла Жалилова, киноактриса Сафият Аскарова, Агьед Агъаев ва гзаф масабур (вирибурун тIварар кьаз жедач) акъатна. 

И школади неинки зурба тарихдалди, гьакI алай вахтунин агалкьунралдини дамахзава. Педколлективди, къайгъударвилелди тарих ва лап хъсан адетар хуьналди, цIийи несилдиз дуьз тарс-тербия гузва, ам инанмишвилелди виликди физва. 1-школа алай вахтундани, гьакI 100 йисалайни сифтеди яз амукьун патал чна алакьдай вири жуьредин куьмекар ийида. Гьуьрметлубур, квез и юбилей рикIин сидкьидай мубаракрай! – алава хъувуна Абдул-Керим Палчаева.

Тамадади (жавабдар и везифа машгьур манидар, республикадин культурадин ла­йихлу къуллугъчи Таира Муспагьовади кьиле тухвана) юбилейдиз талукь доклад авун патал трибунадихъ школадин директор Султанагъа Мисиевадиз теклифзава. Ахпа музыкадин нумрайрин арада, тебрикрин хуш гафар лугьуз, трибунадихъ райондин УO-дин начальник Заира МутIалибова, Смугъулрин школадин директор (гьа и школадин виликан ученик ва директор) Сейфуллагь Назаров ва маса юлдашарни экъечIна.

Мярекатдал рагьметдиз фенвай муаллимар, Ватан патал СВО-да, дяведин маса вакъиайра чанар къурбанд авур выпускникар рикIел хкана. Алай вахтунда, гъиле яракь аваз, душманрихъ галаз женг чIугвазвай виликан ученикри-аскерри экрандилай хайи школадин юбилей мубаракна.

Мярекат райондин кьили 1-нумрадин АСОШ-дин са жерге лап хъсан муаллимрив чухсагъулдин чарарни гьуьрметдин грамотаяр вахкуналди, гьар са нямет алай суфрадихъ ацукьна, тостар лугьуналди, маниярни кьуьлер авуналди ва рикIел аламукьдай шикилар ягъуналди давам хьана. 

Суварин иштиракчийрин гуьгьуьлар чпин манийралдини кьуьлералди и школадин, гьакI аялрин Къияс Межидован, Алла Жалиловадин, Рагьимат Гьажиевадин тIварарихъ галай алава образованидин идарайрин ярат­мишунрин коллективри шадарна.

Дашдемир  Шерифалиев