Казим Казимован – 90 йис
1-майдиз яргъал йисара «Лезги газетдин» редакцияда кIвалахай лезгийрин машгьур публицист, гьикаятчи, Дагъустандин журналистикадин агъсакъал Казим Казимован 90 йис тамам хьана.
И лишанлу вакъиадин вилик Казим Мегьамедшерифовичан кIвализ кьиле «Лезги газетдин» кьилин редактор Мегьамед Ибрагьимов авай журналистрин са десте мугьман хьана. Ачух рикI, къени къилихар авай агъсакъалди вичихъ галаз санал кIвалахай юлдашар хушдиз, багьа мугьманар хьиз кьабулна.
Мегьамед Ибрагьимова Казим Казимоваз вири редакциядин коллективдин патай 90 йисан юбилей мубаракна, адахъ чандин сагъвал, руьгьдин кIубанвал, яргъи уьмуьр хьун алхишна ва баркаллу юбилейдин сагьибдив Гьуьрметдин грамотани пулдин пишкеш вахкана.
Вичин нубатда Казим Казимова вич рикIелай алуд тийизвай хайи коллективдин тIварцIихъ разивилин келимаяр лагьана, «Лезги газет» гьар са рекьяй вилик фин вичин эрзиман мурад тирди къейдна.
Гуьгъуьнлай ихтилатар жуьреба-жуьре тIуьнривни няметрив ацIанвай суфрадихъ давам хьана. Казим Казимова редакцияда кIвалахай йисар рикIел хкана, къелемдин дустариз камаллу агъсакъалдин патай къиметлу насигьатар гана.
* * *
Казим Казимован 90 йисан юбилейдиз талукьарнавай мярекат адан хайи Ахцегь райондани тешкилнавай. Мярекатда райондин администрациядин, медениятдин управленидин, мектебдин векилри, юбилярдин мукьва-кьилийрини ярар-дустари ва милли эдебиятдал рикI алай ксари иштиракна.
Райондин депутатрин собранидин председатель Гьажимурад Парпачева Ахцегь райондин кьил Абдул-Керим Палчаеван патай Казим Казимоваз юбилей тебрикна, ада хайи чIални эдебият вилик тухуник кутунвай пай чIехиди тирди къейдна.
Юбилярдин уьмуьрдинни яратмишунин рекьикай гегьенш суьгьбет Казим Казимовахъ галаз яргъал йисара санал кIвалахай журналист Дашдемир Шерифалиева авуна.
Мярекатдал мад райондин медениятдин управленидин начальникдин заместитель Аделя Агъаева, Ялахърин хуьруьн администрациядин кьил Шихкерим Жабраилов, райондин дишегьлийрин советдин председатель Таира Муспагьова ва масабур рахана.
Чи мухбир
