Дарманрин набататар
Шикилдай аквазвайди чи ерийрани гьалтзавай набатат (явакьан) я. Адет яз, явакьанар кIвалерин патарив, паруйрин, жугъунрин къерех тирвал, гьакIни гадарнавай, бушдиз амай чкайра (аквазвайвал, гьавиляй адал урус чIала «пустырник» тIвар акьалтнава), зирзибилрин патарив, салара, тепейрани ачIара экъечIда.
Пешекарри тестикьарнавайвал, и набатат дармандин макьсаддалдини ишлемишзава, кьилди къачуртIа, рикIин дарман яз. Дарман патал явакьанар абур цуькведа авай июнь–август варцара кIватIун теклифзава. 40 сантиметрдилай яргъи тушиз, набататдин цуькведа авай кукIвар атIун герек я. Гуьгъуьнлай абур чардахрал, хъсандиз шагьвар къекъвезвай чкайра ва я махсус кьурук, 10 сантиметрдилай яцIу тушир къатуна аваз экIяна, мукьвал-мукьвал ктадиз, кьурурна кIанзава.
Важиблу месэла ам я хьи, дармандин такьат яз менфят къачунин рекьерикай, къайдайрикай, ишлемишун къадагъа тир дуьшуьшрикай анжах пешекаррал, духтуррал алукьна, гьабурувай чирун чарасуз я.
«Лезги газет»
