Сифтедай офис, склад ва я подвал яз ишлемишай чка инсанар яшамиш жедай кIвализ, квартирадиз элкъуьриз жеда, эгер санитариядин ва цIай кьуниз акси серенжемрин къайдайриз жаваб гуз хьайитIа.
Ихьтин къуллугъ гьам кьилдин ксариз, гьамни тешкилатризни карчийриз талукь я. Ахьтин чкаяр къанундалди яшамиш жедай чкадиз элкъуьрун патал чарар-цIарар къайдада тун герек жезва. Арзачидив ЕГРН-дай къачунвай выписка, паспорт ва дараматдин (чкадин) документар, цIийи хъувунин проект ва технический паспорт гваз хьана кIанда.
Важиблуди ам я хьи, ихьтин дуьшуьшра ийиз кIанзавай дегишвилерин патахъай кIвалерин вири иесийрихъ галаз (гзаф квартираяр авай дараматдиз талукь жезватIа) умуми собранидал меслят авун герек я, иесийрикай 50 процентдилай гзафбуру разивал къалурна кIанзава.
Арзачидивай документар МФЦ-диз вугуз жеда, гуьгъуьнлай абур месэла гьялун патал талукь муниципалитетдал агакьарда. Гегьеншдиз малуматар герек ятIа, виликамаз МФЦ-дин идарадиз зенгна хабар кьаз жеда.
POS-терминалрай гьакъи гуз жеда
Дагъустандин МФЦ-дин ва «Сбербанк» ПАО-дин отделенидин «Нагъд пул авачир Дагъустан» проектдин сергьятра аваз республикадин мулкара авай МФЦ-дин вири идарайра POS-терминалар эцигнава.
Адан куьмекдалди са жерге къуллугъар кьилиз акъудун патал гьакъи гуз жеда. Абурук акатзава: Россиядин МВД-дин жермеяр, паспорт гун ва дегишарун, водителвилин шагьадатнама, Россиядин ФНС-дин (Федеральная налоговая служба) госпошлина (ИП регистрация авун), Росреестрдин къуллугъар (кадастрдин учет, юзан тийидай эменнидин сагьибвал регистрация авун, ЕГРН-дин делилар), ЖКХ-дин гьакъияр, интернет, образование ва мсб.
Агьалийривай гьакъияр банкунин картайрай гуз жеда. МФЦ-дин пешекарри Сбербанкдин терминалдай гузвай гьакъи гьасятда кьабулзава. Идарадин къуллугъчийри ихтилатзавайвал, им агьалийриз къулайвал хьунин, вахт кьенят авунин рекье арадал гъанвай мумкинвал я.
«Лезги газет»
