ЦIийи йисан эвел кьиляй СтIал Сулейманан райондин ЦIийи Макьарин школадин спортдин майдандал, ина зегьмет чIугур муаллим, хъсан спортсмен Мегьамед-Садикь Къурбанов рикIел хкунин лишан яз, волейболдай ачух турнир кьиле тухвана. 3-сеферда тешкилнавай и мярекатда ЦIийи Макьарин кьве школадин, гьакIни Кьулан СтIалрин школадин ва райондин хкянавай командайри иштиракна.
Турнир ачухуниз талукьарнавай мярекатдал Мегьамед-Садикь Къурбановахъ галаз санал кIелай, кIвалахай, спортдал машгъул хьайи ксари рагьметлудан экуь къамат, адан инсанвилин, дуствилин ва амадагвилин ерияр чими келимайралди рикIел хкана. Райадминистрациядин спортдин, туризмдин ва жегьилрин крарин рекьяй комитетдин директор Чингиз Абдулмежидова районда спортдин рекье къазанмишнавай гъалибвилерикай лагьана ва турнирдин иштиракчийрихъ агалкьунар хьун алхишна.
Къугъунра СтIал Сулейманан райондин хкянавай команда 1-чкадиз лайихлу хьана. ЦIийи Макьарин ва Кьулан СтIалрин командайри 2 ва 3-чкаяр кьуна. Гъалибчи командадин капитандив — кубок, кIвенкIвечи чкайриз лайихлу хьайибурув грамотаярни дипломар вахкана. Турнирда тафаватлу хьайи кьилди спортсменар, спортдин серенжем кьиле тухуз куьмек гайи судьяяр адан тешкилатчийри грамотайралди, пулдин ва къиметлу пишкешралди руьгьламишна.
Тешкиллувал аваз кьиле фейи турнирдин спонсорвал хуьруьнвияр тир карчийри — Муфрудин Муртузалиева ва Мегьамед Жамиева — чпин хивез къачунвай. И кардай абуруз спортсменри, мугьманри ва хуьруьн агьалийри аферин лугьузва.
Мизам Магьмудов
