РД-дин Халкьдин Собранидин депутат Марат Алиярова и йикъара Москвада кьиле фейи Вирироссиядин «Виридалайни хъсан гьаят. Виридалайни хъсан кIвал» конкурсдин гъалибчийриз шабагьар гунин шад мярекатда иштиракна.
Конкурсдин нетижада Дагъустанди шабагьдин сейли чкаяр кьуна ва идалди республикадин агьалийрилай къвезвай теклифрин кьадар, гьакIни аваданламишунин рекье тамамарзавай кIвалахрин ери екеди тирди тестикьарна.
Конкурс вад номинациядай тешкилнавай: «Виридалайни хъсан гьаят», «Виридалайни хъсан подъезд», «Виридалайни дуствилелди яшамиш жезвай кIвал», «Виридалайни гзаф энергия кьенятзавай кIвал», «Райондин жегьил гъилер».
Дагъустандин патай конкурсдиз 124 арза атана. Нетижада «Виридалайни хъсан подъезд» номинацияда сад лагьай чкадиз Махачкъалада авай Россиядин Игит Тулпар Мусалаеван тIварунихъ галай куьчедин 32-нумрадин гзаф квартирайрикай ибарат кIвалин подъезд лайихлу хьана.
«И нетижа – им анжах са касдин гъалибвал ваъ, чIехи коллективди саналди авунвай кIвалах я. Ихьтин агалкьунив анжах умуми къуватралди агакьариз жеда. Жув авай чкадин патарив къайда-низам арадал гъун патал гьамиша анжах зурба такьатар герек туш, – жавабдарвилелди ва рикI гваз эгечIун, макьсаддив агакьариз алахъун ва тупламиш хьун бес я», – къейдна М. Алиярова, гъалибчияр сегьнедилай тебрикдайла.
Чи мухбир
