3-майдиз Дербент шегьерда, Лезги театрдин дараматда, Кьиблепатан Дагъустандин мектебра вири «вадар» аваз кIелзавай аялрин II Слет кьиле фена. Мярекат жемиятдинни сиясатдин деятель, машгьур меценат Мамед Магьарамович Абасован куьмекдалди Кьиблепатан Дагъустандин жегьилрин союзди тешкилнавай.
Слетди Агъул, Ахцегь, Дербент, Докъузпара, Кьурагь, Мегьарамдхуьруьн, Рутул, СтIал Сулейманан, Табасаран, Хив районрайни Дербент, Дагъустандин Огни шегьеррай тир хъсандиз кIелзавай 80 аял са майдандал кIватIна. Мярекатдиз атанвай гьуьрметлу мугьманрин арада Мамед Абасов, Хив райондин кьил Ярмет Ярметов, ДГПУ-дин ректор Нариман Асваров, РД-дин образованидин ва илимдин министрдин заместитель Гуьлнара Абдусаламова, РФ-дин журналистрин союздин РД-да авай отделенидин председатель Мегьамед Ибрагьимов, Дербентдин музейдин-заповедникдин къуллугъчи Гуьлпери Мирзебалаева, Дербентдин халкьдин сеняткарвилерин ва туризмдин колледждин директор Играмудин Нурагьмедов, Агъа СтIалрин хуьруьн администрациядин кьил Надыр Эфендиев, СССР-дин спортдин мастер Вагьаб Къазибегов, Гьажи Давудан тIварцIихъ галай центрадин директор Самур Алиев ва масабур авай.
Слет, Кьиблепатан Дагъустандин жегьилрин союзди тешкилат кардик акатай йисалай инихъ кьиле тухвай кIвалахрикай куьрелди малуматар гуналди, Ахцегь райондин медениятдин управленидин начальникдин заместитель Сулейман Сулейманова ачухна ва эхирдал кьван кьилени тухвана. Адан гафарай малум хьайивал, 2016-йисалай инихъ союзди 800-дав агакьна жуьреба-жуьре мярекатар кьиле тухвана ва анра, санлай къачурла, 14-35 йисарин яшара авай 100 агъзурдалай гзаф жаванрини жегьилри иштиракна. Алай вахтунда жегьилрин тешкилатди 400-дав агакьна волонтерар саднава ва абуру хайи республика, уьлкве патал зегьмет чIугвазва.
Гуьгъуьнлай сегьнедиз союздин регьбер Равидин Абдурагьимоваз теклифна. Ада сифте нубатда Слетдин кьилин игитриз – аялриз, абурухъ галаз мярекатдиз атанвай муаллимризни диде-бубайриз чирвилер къачунин рекье хьанвай агалкьунар мубаракна ва чIехи кукIушрив агакьун патал, рикIе къаст туна, вилик финиз эвер гана. ГьакIни союздин регьберди Слет тухунин карда пулдин куьмек гунай Мамед Абасован тIварцIихъ разивилин келимаяр лагьана. Равидин Абдурагьимова къейд авурвал, им Союзди кьиле тухузвай проектрикай Мамед Абасова пулдин куьмек гузвай сад лагьайди туш, идалай виликни жумарт меценатдин куьмекдалди Кьиблепатан Дагъустандин жегьилрин тешкилатди са шумуд мярекат макьсаддив агакьарна.
Вичин рахунра Равидин Абдурагьимова Слетдиз теклифнавай аялар гьихьтин шартIар фикирда кьуна хкянатIа раижна. Адан гафаралди, союзди Кьиблепатан Дагъустандин гьар са муниципалитетдин администрациядин образованидин управленидиз 11-классрин ученикрин арадай вири вадар аваз кIелзавай ва мектебрин уьмуьрда активнидаказ иштиракзавай аялар тайинарун патал чарар рекье тунвай. Гьар са райондай, шегьердай Слетдиз гъизвай аялрин кьадарни муниципалитетрин агьалийрин умуми кьадар фикирда кьуна тайинарнавай. Мисал яз, Кьурагь райондай Слетдиз 5 аял атанвайтIа, Дагъустандин чIехи муниципалитетрикай сад тир СтIал Сулейманан райондай 11 аял атанвай.
…Мярекат Мамед Абасован гафаралди давамарна. Ада къейд авурвал, ихьтин мярекатар кьиле тухунихъ республикадин образованидин хел санлай вилик финин жигьетдай еке метлеб ава. «КIелунра алакьунар, агалкьунар авай аялриз гьукуматдин дережада аваз гузвай фикир мадни артухарун герек я. Акьалтзавай несил чи пакадин югъ я. Ам экуьди ва бахтлуди хьун патал чна къедамаз къайгъу чIугуна кIанда. Гьикьван бажарагълу аялрик руьгь кутадай серенжемар тешкилайтIа, гьакьван абурухъ мадни виликди фидай ашкъи жеда. Зун лагьайтIа, идалай кьулухъни неинки са образованидин хиле жуьреба-жуьре хъсан проектриз куьмек гуз гьазур я», — лагьана Мамед Абасова.
Слетдал гзафбур рахана. Абурукай сад «Лезги газетдин» кьилин редактор Мегьамед Ибрагьимов тир. Ада Мамед Абасова республикада гзаф проектар кьилиз акъудуниз куьмекар гузвайдакай хабар гана. Мисал яз, алай вахтунда уьлкведин дережадаваз машгьур журналист Алик Абдулгьамидован экуь къаматдиз бахшна тухузвай журналистрин конкурсдизни чи кьегьал ватанэгьлиди къаюмвалзава.
«Мамед Абасован лайихлувилер фикирда кьуна, РФ-дин журналистрин союздин РД-да авай отделенидин правлениди Мамед Магьарамовичаз Госдумадин депутатар хкядай сечкийра иштиракун теклифна. Ада чи теклиф кьабулна. 25-31-майдиз электронный къайдада «Единая Россия» партиядин сифтегьан сечкияр кьиле фида. За квевай виридавай чи гьуьрметлу меценат Мамед Магьарамовичан тереф хуьн тIалабзава. Дагъустандин патай виринра лайихлу ксари иштиракун герек я. Мамед Абасов гьахьтинбурукай сад я», — лагьана ада.
«Заз гьакIни ихьтин проектар гъиле кьазвай, абур кьилиз акъудун патал герек вири рекьер-хуьлер жагъурзавай (пулдин такьатар чара ийидай меценатар жагъурунилай гатIунна, мярекатар хъсан дережадаваз тешкилунал къведалди) чи кьегьал стха, Кьиблепатан Дагъустандин жегьилрин союздин кьиле акъвазнавай Равидин Алимович Абдурагьимоваз, адаз и карда куьмекар гузвай союздин вири дестедиз сагърай лугьуз кIанзава», — алава хъувуна Мегьамед Ибрагьимова.
Слетдин сергьятра аваз, иштиракчийрин арада милли медениятдизни тарихдиз талукьарнавай викторинани кьиле тухвана. Театрдин фойеда лагьайтIа, Гьажи Давудан тIварцIихъ галай центради, Дербентдин халкьдин сеняткарвилерин ва туризмдин колледжди махсус выставкаяр тешкилнавай.
Слетдиз эвер ганвай гьар са аялдиз Кьиблепатан Дагъустандин жегьилрин союздин патай 20 агъзур манатдин кьадарда авай пулдин пишкешар, союздин гьуьрметдин грамотаяр, РД-дин образованидин ва илимдин министерстводин разивилин чарар, махсус статуэткаяр ва маса савкьатар гана.
Агъадихъ чна лезги районрай Слетда пишкешриз лайихлу хьайи аялрин тIварар кьазва.
Ахцегь райондай – Самира Абдулкеримова, Мухлиса Алимегьамедова, Гьажимурад Агьмедов, Асвар Къадиров, Лейла Майланова, Сабина Мустафаева, Амина Эскерханова; Дербент райондай – Герман Керимханов, Саира Керимова, Айшат Эфендиева, Амир Абдуллаев, Наиля Ибрагьимова, Гьевер Юзбегова, Айшабике Абдулкьасумова; Докъузпара райондай – Алия Абасова, Мирзали Айдунбегов, Мегьрибан Алиева, Алина Бейтуева, Фаина Эмирчубанова; Хив райондай – Сейбат Мегьамедова, Заира Жафарова, Назлу Исмаилова, Жавад Хидиров, Рамазан Гьасанов, Заира Рамазанова; СтIал Сулейманан райондай – Карина Якьубова, Ангелина Наврузова, Сарайханум Гьамзатова, Пакизат Нажафова, Ханум Эфендиева, Фейруза Рамазанова, Луиза Дадашева, Саида Гуьлмегьамедова, Рамзан Абдулаев, Каролина Аликберова; Кьурагь райондай – Эсед Азизов, Жаклина Наврузбегова, Азиз Цмиханов, Шамиль Хариев, Имамудин Таибов; Мегьарамдхуьруьн райондай – Хадижа Гьажиева, Секинат Байрамбегова, Алейханум Къагьриманова, Алина Керимханова, Фатима Атлуханова, Салият Кьасумова, Алина Мегьамедова, Луиза Османова, Иера Юзбегова.
Агьмед Магьмудов
