И йикъара Махачкъалада, Даниялован куьчедин 31-нумрадин дараматда кардик квай «Дагестанский аул» музейда, «Сеняткарвал: алатай вахт, алай аям ва гележег» музейдин проектдин сергьятра аваз, гьакI Россиядин халкьарин садвилин йисаз талукьарна, Дагъустандин лайихлу муаллим, РФ-дин умуми образованидин гьуьрметлу работник, Евразиядин художникрин художественный союздин, Дагъустандин дизайнеррин Гильдиядин союздин член, «Гьакъисагъ зегьметдай» медалдин, Вирироссиядин са шумуд конкурсдин ва маса шабагьрин сагьиб тир чи ватанэгьли Фироза Надировна Панагьовадин «Халкьдин костюмдин шиират» лишандик кваз 50-далай виниз нинийрикай ибарат выставка ачухна. Дугъриданни, ада чав нинийрин алемдиз маса тегьерда вилер ачухиз тазва, чи уьлкведин халкьарин адетдин культурадин алемдиз сиягьатдай мумкинвал гузва. Автор гьар са нини арадал гъунив бажарагълувилелди, рикI гваз эгечIуни, санлай къачурла, абурун роль мадни чIехиди ийизва: абур чи тарихдин чинриз, чи адетриз, санлай Дагъларин уьлкведин милли парталрин жуьреба-жуьревал къалурзавай яржариз элкъвезва…
Ф. Панагьовадин ери-бине Хасавюрт райондин Къурушдилай я. Ада Нальчикда яру дипломдалди педучилище, Махачкъалада ДГПУ акьалтIарна. Яргъал йисара республикадин образованидин хиле зегьмет чIугур, эхиримжи саки 10 йисуз Санкт-Петербургда яшамиш жезвай ва баркаллу и пеше давамарзавай адан выставка Дагъустанда сад лагьай сеферда тешкилнава. Республикадилай къеце яшамиш жедайлани, Дагъустандихъ галаз сих алакъа хуьзвай чи ватанэгьлидин гъилин сеняткарвилиз, вичи лугьузвайвал, хоббидиз, итиж авуналди, выставкадиз атанвайбурун кьадар лап гзаф тир. Абурун арада республикадин медениятдин рекье машгьур ксарни гзаф авай.
Выставка ачухуниз талукьарнавай шад мярекат музейдин директордин заместитель Ирина Хайбулаевади ачухна, кIватI хьанвайбур выставкадин автордин уьмуьрдин ва кIвалахдин рекьерихъ галаз танишарна. Мярекатдал рахайбуру, гьа гьисабдай яз, Дагъустандин художникрин союздин председатель Къурбанали Мегьамедова, Махачкъаладин А. Жалиловадин тIварунихъ галай 8-нумрадин искусствойрин школадин (ина чи ватанэгьлиди яргъал йисара кIвалахайди рикIел хкиз кIанзава) директор, Дагъустандин халкьдин артистка Зульфия Ильясовади, РФ-дин халкьдин художник Гьамзат Гъазимегьамедова, М. Жемалан тIварунихъ галай ДХУ-дин директор Мухтар Камбулатова, Дагъустандин дизайнеррин Гильдиядин регьбер Мунажат Гьасановади ва масабуру Фироза Панагьовадин, пешедиз вафалувал хьиз, гьар са аялдин бажарагъ ачухун патал ам кьетIендаказ эгечIун, адан инсанвилин виниз тир амай ерияр, выставкадин экспонатрин мана-метлеб, абурал чIугунвай зегьмет къейдна.
– Мукьвара зун Санкт-Петербургда авай. Фироза Надировнади зегьмет чIугвазвай Красногвардейский райондин 6-нумрадин школа-интернатда са шумуд юкъуз мугьманвиле хьана, анин кьиле авай ксарихъ ва аялрихъ галаз суьгьбетарна. Дагъларин уьлкведихъ галаз авай сих алакъа Фироза Надировнади анани хуьзвайди акуна. Куьн пара сагърай! – алхишна Зульфия Ильясовади.
КьетIендаказ къейд авуниз лайихлу я хьи, Санкт-Петербургда чи ватанэгьлиди бедендин мумкинвилер сергьятламиш хьанвай аялрихъ галаз кIвалахзава, абуруз технологиядин тарсар гузва. Педагогвилин 45 йисалай виниз стаж авай ада «кьетIен» аялриз уьмуьр кьиле тухуз чирзава лагьайтIани, ягъалмишвал авач. Муаллимвал ада пешени, уьмуьрдин рехъни, кьисметни яз гьисабзава. Гьакъисагъ зегьметдай адаз кутугай къиметни ганва. Красногвардейский райондин технологиядин муаллимрин методикадин рекьяй кIватIалдин член яз, Ф. Панагьовади вичин тежриба жегьил муаллимривни агакьарзава – мастер-классар, классдилай къецяй тир мярекатар тухузва, педсоветрин заседанийрал докладар кIелзава. Вичин чирвилер ва алакьунар акьалтзавай несилдал агакьариз хьунал ам шад я. Гьа са вахтунда вичин устадвални датIана хкажзава.
Выставкадин сергьятра аваз Фироза Панагьовади хранвай, чпе гьам адетдин, гьамни алай аямдин «таъсир» какахьнавай милли пек-парталарни къалурна. Дагъустандин халкьдин артистка Зарифа Къухмазовади ва масабуру тамамарай халкьдин манийри, Марьям Пиргьуьсейновади авур кьуьлуьни кIватI хьанвайбурун гуьгьуьлар мадни ачухарна.
Выставка 2-августдалди давам жеда.
Рагнеда Рамалданова
