Ватандин ЧIехи дяведин иштиракчи, 1942-йисан июлдин вацра Севастополь шегьер патал кьиле фейи женгера кьегьалвилелди телеф хьайи кьурагьви Абдуселим Назаралиеван хва Жавид Назаралиев хайи хуьруьн, райондин тарихда баркаллу гел тунвай рухвайрикай сад я.

Ам 1931-йисан 1-майдиз­ Кьу­рагьрин хуьре дидедиз­ хьана. Чкадин мектеб акьалтIа­рай­далай кьулухъ жегьилдиз­ Совет­рин  Армиядин жергейриз­ эвер гана. Кьисметди ам Саратовдин областдин Энгельс шегьердиз акъудна. Ина дири­баш кьурагьвиди военно-авиа­ционный училищеда чирвилер къачуна.

1955-йисуз Ж. Назаралиева къуллугъзавай кьушундиз реак­тивный двигателар алай самолетар — ИЛ-28 бомбардировщикар чара авуна. 3 касдикай ибарат экипаждиз самолетдин техникадин мумкинвилер ахтармишун буйругъна. Хиве тунвай­ везифа кьилиз акъудун патал экипаж аваз цавуз хкаж хьана. Самолетдин мумкинвилериз къи­мет гузвай пешекаррин арада авиациядин старший лейтенант, чи ватанэгьли Жавид Абдуселимович Назаралиевни авай.

Цава лув гузвай чIавуз самолетдин са двигатель кардикай­ хкатна, акьалтIай хаталу гьал арадал атана. Яшайишдин кIва­лериз зиян тахьуй лагьана, чилел аватзавай самолет, экипажди кьетIен гьалара тамун тарар атIана михьнавай гуьтIуь зу­луна­ ацукьардай къарар кьабулна. Амма хкягъай чка дяведин залан самолетдиз кутугайди хьанач, мусибат арадал­ атана: кьве кас — штурманни ли­шан­чи-радист — телеф хьана. Кьулантарциз хасаратвилер хьан­вай, кIвач ханвай старший лейтенант Назаралиев Саратов­дин госпиталдиз агакьарна. Сагъламвал мягькем хъхьайдалай кьулухъ Жавид Назаралиев хайи хуьруьз рекье хтуна.

Чан аламукьай летчикдик, самолет тамун зулуна ацукьарна лагьана, садани тахсир кутунач, гьикI лагьайтIа, экипаждихъ маса рехъ авачир. Эгер самолет яшайишдин кIвалерал аватнайтIа, кьиникьар мадни пара хьун мумкин тир.

Агьмед  Магьмудов