Гьуьрметлу редакция!
Виликан вахтара чи халкьарин эдебиятрин даях, буба хьиз хьайи Максим Горькийди чIехи Стlал Сулейманаз кхьей кагъаз веси хьтин «вун ви халкьди хуьрай, Сулейман!» гафаралди куьтягьнай.
И делил рикIел хтайла, фикир авурла, эхиримжи вахтарал вил вегьейла, суалар арадал къвезва: чавай ам хуьз жезвани, лазим тирвал, бес кьадарда хуьз жезвани, гьамиша хуьз жезвани? ГьакI хуьз тежезвайди хиве кьунални къвезва.
РикIел хквезвайди, ихтилатзавайди, фикир ийиз тазвайди чи вилик-кьилик квай юлдашри-стхайри СтIал Сулейманан тIвар ДГУ-дал эхциг хъувунин месэла гьакI амукьуникай, абурни, чунни кисна акъвазуникай я. Им чаз, Сулейманан халкьдиз, лайих тушир ажузвал-агъузвал хьизни акуникай я…
Ша чна и месэла кьилиз акъатдайвал ийин, истемиш хъийин, гьялин. Им чи халкьди вичин Сулейман хуьнни жеда, адан лайихлувал, такабурлувал хуьнни! Россиядин халкьарин садвилин йисан мурадар-метлебар кьилиз акъудуник кутазвай пайни (къвезвай гьуьрмет-къимет гьакъикъатда жез хьайила тушни кьван халкьариз сад жез, садвал хуьз кIан жедайдини?!).
Кичибег Мусаев,
Дагъустандин халкьдин шаир
