И мукьвара Италиядин Венеция шегьерда кадетрин, жаванрин ва 21 йисал къведалди яшара авай жегьилрин арада дуьньядин кIвенкIвечивал патал кьиле фейи акъажунра 109 уьлкведай тир 1900-далай виниз спортсменри иштиракна. Ана чи ватанэгьли, вичин ери-бине Ахцегь райондин КьакIарин хуьряй тир, хизандихъ галаз Саратов шегьерда яшамиш жезвай жегьил спортсмен Агьмед Агьмедова 67 кг-дин заланвал авайбурун арада гимишдин медаль къазанмишна.
Къейд авун лазим я хьи, акъажунра 21 йисал къведалди яшара авайбурун арада иштиракай А. Агьмедова 6 бягьс кьиле тухвана, вири гъалибвилер къазанмишуналди акьалтIарна. Амма финалда (бягьс сад хьтин гьисаб аваз эхирдиз атанвай) ам Египетдай тир Адел Омараз кумукьна.
РикIел хкин: 5 йиса авайдалай инихъ каратэдал машгъул жезвай ва вич спортдин и жуьредай еке гележег авайбурукай сад яз гьисабзавай Агьмеда Россиядин ва Европадин кIвенкIвечивал патал акъажунра гъалибвилер са шумудра къазанмишна. Ам дуьньядин Кубокдин сагьиб, хейлин турниррин ва акъажунрин гъалибчи ва призёр я. Ада самбодайни вичин устадвал къалурзава. И жуьредай чи ватанэгьли Приволжский федеральный округдин кIвенкIвечи, Россиядин чемпионатдин гимишдин медалдин сагьиб я. Алай вахтунда Агьмеда Саратовдин госуниверситетда кIелзава. Шегьердин виридалайни викIегь каратист яз гьисабзавай ада вичин буба, каратэдай Россиядин 3 сеферда чемпион, спортдин мастер, чIулав чIулунин сагьиб, Саратовдин областдин лайихлу тренер Ихтибар Агьмедован гъилик устадвал хкажзава.
Рагнеда Рамалданова
