Кьурагьрин хуьруьн спортдин дараматда райондин школайра кIелзавай аялрин арада военно-прикладной жуьрейрай гьар йисуз кьиле тухун хъсан адетдиз элкъвенвай акъажунар кьиле фена. Ватан хуьзвайбурун йикъаз бахшнавай абур Россиядин гимн тамамарунилай ва спортдин серенжемдин иштиракчияр райондин муниципалитетдин тIварунихъай тебрик авунилай башламишна.
ИкI, низамдин (строевой) гьазурвиляй, путар хкажунай, автомат чукIурунай ва кIватIунай, цIил ялунай ва маса жуьрейрай кьиле фейи акъажунра Кьурагьрин 2-нумрадин СОШ-дин команда — 1, КьепIиррин СОШ-дин команда — 2 ва Кьурагьрин 1-нумрадин СОШ-дин команда 3-чкайриз лайихлу хьана.
Абуруз кубокар, грамотаяр, медалар ва спортдин пишкешар гана. Акъажунрин нетижаяр фикирда кьуналди, апрелдиз кьиле фидай Вирироссиядин «Зарница 2.0» къугъунин зонадин паюна иштиракун патал райондин хкянавай команда туькIуьрда.
Рагнеда Рамалданова
