Уьлкведин меркезда туризмдин ва мугьманар кьабулунин индустриядин международный выставкади вичин кIвалах куьтягьна. Ана Дагъустандин стендни кардик кутунвай. Республикадин Кьил Сергей Меликова вичин телеграм-каналда хабар гайивал, Дагъларин уьлкведин стенддиз килигиз 15 агъзурдав агакьна инсанар атана.
«Чаз туризмдин ва мугьманар кьабулунин индустриядин международный выставкада иштиракун адет хьанва. Вад лагьай сеферда чи республика и важиблу мярекатдин стратегиядин метлеб авай иштиракчи я. Гъилевай йисуз выставкади дуьньядин 40 уьлкведай 900 компания кIватIнавай.
Выставкадин нетижаяр кьурла, чаз «Туризмдин стратегиядин регион» номинациядай шабагь гана. Ихьтин агалкьун къазанмишун вич-вичелай арадал атанач. Республикада туризмдиз талукь хейлин кIвалахар ийизва, цIийи маршрутар ахъайзава, дагъвийрин адетриз, культурадиз талукь мярекатар къалинарзава.
Дагъустанди уьлкведин регионрихъ ва маса уьлквейрихъ галазни алакъаяр мягькемарзава. Выставкадин сергьятра аваз, Омандин Султанатдин, Китайдин векилрихъ галаз меслятар авуна ва туризмдин рекьяй операторрихъ ва хейлин компанийрихъ галаз санал кIвалахунин гьакъиндай икьраррал къулар чIугуна.
Россиядин халкьарин садвилин йисуз Дагъустанди вичин кьилин къиметлувал, девлетлувал – цIудралди халкьарин арада авай дуствал, милли культура къалурна. Инсанар хушвилелди чи халкьарин адетрихъ галаз таниш жезвай. Чи устIаррихъ, сеняткаррихъ галаз халкьдин художественный безекар гьазурунин карда иштиракзавай. Абуру чпихъ галаз Дагъустандин культурадикай малуматар хутахна…», — кхьена вичин телеграм-каналда региондин Кьили.
Хийир Эмиров
