«Урусрин сегьне»
5-октябрдилай 13-октябрдалди Дагъустандин меркезда Вирироссиядин театррин «Урусрин сегьне» IX фестиваль кьиле фена. Дагъустандин культурадин министерстводин куьмекни галаз тешкилнавай адан художественный руководитель ва проект рикIел гъайи кас РФ-дин искусствойрин лайихлу деятель Скандарбег Тулпаров тир. Фестиваль Махачкъалада А.-П. Салаватован тIварунихъ галай музыкадинни драмадин театрдин сегьнедал, В.И. Качалован тIварунихъ галай Казандин академический урусрин ЧIехи драмтеатрди «Гьич фикирдизни гъиз тежер югъ ва я Фигаро эвленмиш хьун» тамаша къалуруналди, ачухнай. Дагъустандин культурадин министр Зарема Бутаевади театрдин регьбер-директор Александр Славутскийдиз фестивалдин диплом ва статуэтка ганай.
Алай йисуз, фестивалдин сергьятра аваз, урусрин драмадин пешекарвилин 14 коллективди сегьнедал чпин устадвал къалурна. Кьилди къачуртIа, абур Башкортостандай, Татарстандай, Калмыкиядай, Адыгеядай, Ингушетиядай, Карачаево-Черкесиядай, Мариуполдай ва Донецкдай атанвайбур тир. Фестивалдин программадик конкурсдин къалурунар, мастер-классар, Россиядин халкьдин артистар тир Евгений Князевахъ ва Александр Славутскийдихъ галаз «театрдин гуьруьшар» квай.
Регина Семедова