2027-йисан 1-сентябрдилай 10-11-клас­сра кIелзавай аялри физика­, химия, биология, математика ва информатика цIийи хъувунвай ва теж­риба артухарунихъ элкъуьрнавай­ программайрай чирвилер къачуз башламишда.

Хабар гузвайвал, программаяр илимдинни техникадин алай аямдин агал­кьунрихъ галаз алакъалу авуна туь­кIуьр хъувунва, гьакIни абурун тежрибадихъ галаз алакъалу пай гзафарнава.

«Россиядин технологийрин жигьетдай аслу туширвилин важиблувал математикадин ва тIебии илимрин образованидин ери хкажуниз талукь вири патарихъай фикирда кьуна туькIуьрнавай планда къалурнава», – гъавурда твазва РФ-дин просвещенидин министерстводин пешекар М.Костенкоди.

Алай вахтунда министерстводи федеральный майданра сад хьтинбур жедай учебникар туькIуьрунин са шумуд дережадикай ибарат план гьазурзава­. Абур акъудайдалай кьулухъ уьлкведин­ мулкунал кIелзавай вири аялри сад хьтин ктабрай чирвилер къачуда. Вири тар­са­рай государстводин сад тир учебникар­ туькIуьрунин кIвалах 2029-йисалди акьал­тIарун пландик кутунва, абур уьл­кведин мулкунал тамамдаказ ишлемишунал 2032-йисалди элячIда.

Дагъустандин образованидин ва илимдин министерстводи хабар гузвай­вал, республикадин мектебар 5-11-классар патал Россиядин тарихдай ва вири санлай къачур (всеобщая история) тарихдай ктаб­рал­ди тамамдаказ таъминарнава.

ГьакIни Россиядин прос­вещенидин минис­тер­ст­во­ди уьлкведин вири регионрин школайриз кIелунин 2026/27-йис патал тарсарилай къецяй кьиле тухудай курсарин чешнеяр рекье тунва, хабар гузва «Хабарар» РИА-ди.

Курсарин сиягьдин ва абурун кьадардин гьакъин­дай эхиримжи къарар образованидин теш­­килат­дин хиве амукьзава. Сиягьдик «Важиб­лудакай суьгьбетар» (1-11 классра гьаф­те­да са сят), «Россия – зи горизонтар» (6-11-классра гьафтеда са сят), «Россиядин картар» (1-класс­да са сят, 2-4-классра гьафтеда кьве сят), военный рекьяй чирвилер гун патал кIватI хьунар ва я военный рекьяй сифтегьан гьазурвилер (8-классда 17 сят ва 10-классда 35 сят) акатзава.

Тарсарилай къерехдай тухузвай­ кӀва­лахдин умуми кьадар гьафтеда 10 сятдилай, кӀелунин вири девирда ла­гьайтIа, сифтегьан школада – 1 350 сятдилай, асул мектебда – 1 700 сятдилай ва чӀехи школада 680 сятдилай виниз тахьун лазим я. Министерстводи къейдзавайвал,­ курсарик кутунвай месэлаяр ва абурун­ мана Россиядин Президент Владимир­ Путинан тапшуругърин бинедаллаз туь­кӀуьрнава.

Чи мухбир