Спортдин гьи жуьреда хьайи­тIани агалкьунар, гъалибвилер къазанмишун регьят кар туш. Спортсменди датIана зегьмет чIугуна, гьар йикъан тренировкаяр авуна, тренердин истемишунар кьилиз акъудна ва пешекарвилин устадвал хкажна кIанзава. Анжах гьа и чIа­вуз ам бегьерлу нетижайрини вилив хуьда.

2015-йисуз Бакуда Европадин къугъунар кьиле физвай. Боксеррин акъажунар къизгъинбур тир. 64 кг-дин заланвал авай­бурун арада международный классдин мастер, Россиядин чемпионатрин ва Европадин чемпионатдин призер Максим Да­дашевни авай. Ада вичин къаршидиз экъечIай кьве боксердал гъалибвал къачуна. Пуд лагьай бягьсинани ада ирландви Дин Уолш хъсандиз кIеве твазвай. Сад лагьай раундда Уолш нокдаундизни ракъурнай. ЯтIани судьяйри гъалибвал ирландвидиз “багъишна”. Ихьтин гьахъсузвили еке къал-ма­къал арадал гъана, судьяярни чпин везифайрикай азадна (дисквалификация авуна), амма къу­гъу­нин нетижа Максиман гьисабдиз дегишар хъувунач.

ИкI, вичивай гъалибвал къа­къудайла, интервью авурла, Да­дашева хиве кьунай: “Гьахъсузвилелди зун магълуб яз гьисабай дуьшуьшар инлай виликни хьайиди я. Тренерри, амадагри, дустари майилвал ийидай, зун къуватлу, викIегь тирди тестикьардай, амма нетижа гьа сад яз амукьдай. Зун гимишдин, къи­зилдин медалрикай магьрумнай. Бакуда авур нагьакьан карди зи рикI тIарна. Судьяйрихъ са инанмишвални амукьнач. Абуру, са нин ятIани тIала­бу­нар, истеми­шу­нар кьилиз акъудуналди, спортдин къайдаяр чIурзава. Им ерли рехъ гана кIанзавай кар туш, амма вучда, гьахъсузвал чал кIанзни-такIанз туьш жезва…”

Белки, Бакуда вичиз кьур карди жегьил ва алакьунар авай боксер пешекарвилин боксдиз ва Америкадиз финиз маж­бурна.

Дадашев Максим Къайибханович 1990-йисан 30-сентябрдиз Ленинградда дидедиз хьана. Школада амаз гада боксдин секциядиз гьахьна. Сифтегьан чирвилер ада тренерар О.Соколован ва Р.Додаеван гъилик къачуна. Алакьунар авай ва тренировкайрихъай кат тийидай жаванди спортда вичин тIвар машгьурдайди кьатIай тренерри адахъ галаз алава сятерани кIва­лахна. Максима вири четинвилериз дурум гана, шегьерда школьникрин, студентрин арада кьиле тухузвай турнирра сифтегьан гъалибвилерни къазанмишна.

Балтикадин Д.Устинован ­тIв­а­рунихъ галай “Военмехда” — гостехуниверситетда кIелдай­лани, Максим Дадашева спорт гадарнач. Ам мадни кьетIи­ви­лелди, мукьуфдивди вичин ус­тад­вал хкажунал, беден лигимарунал, гъилин ягъунин къуват гужлу авунал машгъул хьана. Ида вичин нетижаярни гана.

2008-йисуз Максим Дадашев дуьньядин рингдиз экъечIна. Жаванрин арада кьиле фейи чемпионатда ада 2-чка кьуна. 2010-2012-йисара лезги хци Россиядин чемпионатра — буьруьнждин, 2013-йисуз гимиш­дин­ медалар къачуна. Вилик йи­сара, гьакI 2015 — йисузни Дадашева гзаф турнирра, чемпионатра иштиракна, 250 сеферда рингдиз экъечIна, хейлин акъажунра гъалибвилер къачуна. Гуьгъуьнлай малум хьайивал, пешекарвилин боксдихъ галаз алакъалу менеджерри Дадашеваз ва адан акъа­жунриз дикъет гузвай кьван.

Интернетда Максим Дадашеваз талукь гзаф малуматар ава. Адан менеджер, ам Top Rank пешекарвилин боксдин компаниядиз тухвай Эгис Климаса кхьизва: “Ихьтин лап виниз­ тир дережадин боксер чи компаниядиз гъунал зун пара шад я. Санкт-Петербургдай тир Россиядин боксерди гзаф турнирра иштиракна ва гъалибвилер къазанмишна. Адахъ Top Rank компаниядин къаюмвилик кваз тарифлу гележег ва агалкьунар жедайдахъ зун инанмиш я”.

Промоутердин Top Rank компаниядин вице-президент Карл Мореттиди лугьузва: “Максим Дадашев къуватлу, жуьрэтлу боксер я. Адахъ рингдиз вичин къаршидиз экъечIай боксеррин жуьреба-жуьре стилриз хсуси уламар жагъурдай ва рум гудай алакьун ава. Ада рингда кIвалахзавай жуьреди, командадив эгечIзавай тегьерди боксер мадни вилик тухуда ва ви­чикай­ сеслудаказ хабарда. Чна адахъ га­лаз са шумуд йисан кон­тракт ку­тIун­нава”.

Пешекаррин гафар, къиметар бушбур хьанач. Пешекарвилин рингдиз экъечIай гьа сифте йикъалай Максим Дадашева вич устадлу ва викIегь боксер тирди успатзава.

Калифорния штатдин Окснард шегьерда яшамиш жезвай ва тренер Роберт Гарсиядин гъилик машгъул жезвай Дадашев 2016-йисан 2-апрелдиз сифте яз пешекарвилин рингдиз экъечIна, Top Rank компанияда кIвалахиз зур йисни тахьанмаз. Порт Хаенеме (США) шегьерда кьиле фейи акъажунра Дадашевалай гъейри, Россиядин мад кьве боксерди иштиракзвай: Олимпиададин чемпион Егор Мехонцева ва Европадин чемпион Александр Беспутина. Дадашева американви Дарин Хамптоназ вичин гъутарин къуват къалурна. Сад лагьай раундда ам нокдаундиз фе­на, кьвед лагьай раундда американвидивай мад дурум хгуз хьанач. Сад ла­гьай­ гъалибвал!

Ахпа сад-садан гуьгъуьналлаз гъалибвилер. 11 женг ва 11 гъалибвал. 14-майдиз Калифорниядин Студио-Сити шегьерда кьвед лагьай бягьс — американви­ Рашад Богарахъ галаз. Чкадин боксердивай 4-раунддалди дурум гуз хьана, ахпа нубатдин сеферда Максиман гъуд галукьай Рашад, дергес галукьай къур хьиз, чилел аватна. 2017-йи­сан 27-январдиз гьа и ше­гьер­да Дадашева 6 лагьай раундда мад са американви Жерома Родригес нокаутдиз ракъурна.

11- ноябрдиз Фресно ше­гьерда кьиле фейи женгера Максимаз Да­гъустандай тир чеченви Артур Бетербиевахъ галаз таниш жедай мум­кинвални хьана. Адани­ ина вичин заланвиляй бягьс чIугвазвай. Чи ватанэгьли Флорида шегьердай тир Клэрэнсон Бутахъ галаз гуьруьшмиш хьана­. Сифте раунддилай Максима Бут гатаз гатIунна. Адавай сакIа­ни Да­дашеван ягъунриз туькIвей жаваб гуз жезвачир. 4-раундда ченедихъ гъуд галукьайла, Бутан­ сивяй капани (спортдин хасаратвилерикай хуьн патал сарарал гьалдзавай затI)  аватна. Женг давамар хъувурла, Максима ахьтин­ ягъунар кьуна хьи, рефери женг акъвазаруниз мажбур хьана. Та­хьайтIа, Бут лап гьелекун жез­вай­.

Алай йисни чи ватанэгьли патал бегьерлуди жезва. 10-мартдиз ада Карсон шегьерда Абдиэль Рамирес, 9-июндиз Лас-Вегасда Дарлейс Перес нокаутдиз ракъурна. И женгер жедалди ви­лик Дадашеван ягъунриз Лос-Анджелесда Хосе Мардуфодивай, Билал Махасинавай дурум гуз хьанач.

Пешекарвилин боксдал маш­­гъул пагьливанриз лакIабар гудай адет авайди я. Дадашеваз “Терс Макс” лугьузва. Чи ватанэгьлийриз Дадашеван ала­кьунрикай ва агалкьунрикай бегьем малуматар авач­тIани, Америкадин пешекарвилин боксдай женгер тешкилзавай шегьерра адахъ вичин тереф хуьзвайбур, амадагар хьанва. Абуру ам, гьар рингдиз экъечIайла, гьевеслу гьараюнралди къаршиламишни ийизва, “Терс Макс” тIвар кьаз, адан руьгьни хкажзава.

Устадлу лезги боксер “Терс Макс” вичин нубатдин женгериз гьазур жезва.

Нариман Ибрагьимов