СВО-да иштиракзавайбур вири халис игитар я. Аскеррин ва абурун хизанрин дерди-бала туькIуьрун, игьтияжар таъминарун, куьмекар гун — ибур къенин юкъуз СтIал Сулейманан райондин администрациядин эвелимжи везифайриз элкъвенва.
Мукьвара Герейханован хуьруьн 2-отделенидин Белинскийдин тIварунихъ галай куьчеда авай агьалийри райондин администрациядиз электричестводин эквералди таъминарунин кIвалах хъсанарунин патахъай арза авунай. И куьчеда СВО-дин иштиракчийрин 3 хизан яшамиш жезва.
Райондин кьил Саид Темирханован тапшуругъдалди, талукь пешекарри герек кIвалахар гъиле кьуна ва са куьруь вахтунда кьилиз акъудна. Куьчеда 10-далай виниз цIийи даяхар акIурна, цIийи симер чIугуна.
Агьалийрин тIалабуналди куьчедиз хирхем вегьена, дуьзарна, цин хуьлер къайдадиз хкана. Са тIимил вахт вилик куьче газдалди таъминарунин проектни кьилиз акъудна, газдин объектар цIийикIа туькIуьр хъувуна.
СВО-дин иштиракчийрин хизанрин арзайриз килигна, хуьрера куьчеяр къайдадиз гъунин, газ, эквер, хъвадай ва дигидай яд агакьарунин жигьетдай тухвай ва тухузвай кIвалахрай агьалийри, СВО-дин аскерри ва абурун хизанри райондин администрациядиз сагърай лугьузва.
* * *
ЦIийи Макьарин хуьруьн цIийиз арадал атанвай магьледин агьалийри, гьабурукай яз СВО-дин иштиракчийрин хизанрини, райондин кьил Саид Темирхановаз электричестводин къурулуш цIийикIа туьхкIуьрунин патахъай арза авунай. И проектдиз пулунин такьатар муниципальный бюджетдай чара авуна.
Микрорайонда алай аямдин гужлу трансформатор эцигна. Идалайни гъейри, 1,2 километрда линияр дегишарна: 400 метрдилай виниз мензилда виниз тир гужлувилин ва 700 метрда агъуз тир гужлувилин линияр алай аямдин симералди дегишарна. Мадни 16 даях акIурна. Мукьвал йикъара микрорайонда кIвалахар тамамвилелди акьалтIарда, Фатагьован, Гьамзатован ва Бабаханован куьчейра яшамиш жезвай агьалийрив дурумлудаказ электричество агакьда.
Хазран Кьасумов
