И йикъара Каспийскда, Росгвардиядин РД-да авай управленида, «Къуват, намус, хизан!» лишандик кваз, Ватан хуьдайбурун йикъаз, Росгвардиядин 10 йисан юбилейдиз ва къанун-къайда хуьдай кьушунар арадал атана 215 йис тамам хьуниз талукьарна, инин вири подразделенийрин къуллугъчийрин ва абурун аялрин иштираквал аваз спортдин сувар кьиле фена. Ам Росгвардиядин РД-да авай управленидин начальник, полковник Вадим Кузнецова ачухна, кIватI хьанвайбуруз лишанлу мярекат тебрикна.
Спартакиададин программадик са шумуд эстафета квай («Змейка с мячом», «Урожай», «Лягушка-путешественница», «Гусиный шаг»). Адан вири иштиракчийри неинки физический жигьетдай къуватлувал ва мягькемвал, гьакI, сада-садаз куьмек авуналди, командада аваз кIвалахиз алакьунни къалурна. Къизгъиндаказ кьиле фейи акъажунрин нетижада командайри чкаяр агъадихъ галайвал пайна: «Ягуар» ОМОН-дин (транспортдин) команда – 1, «Ястреб-Каспий» СОБР – 2 ва «Скорпион-Каспий» ОМОН – 3.
КIвенкIвечи чкаяр кьур командайрив шабагьар вахкудайла, Вадим Кузнецова суварар тебрикна, хизанра хушбахтлувални шадвал хьун алхишна, ихьтин мярекатри хизандин ивирар мягькемарунин рекье важиблу роль къугъвазвайди къейдна. Сифте сеферда кьиле тухванвай, гьам аялриз, гьамни чIехибуруз итижлу легьзеяр багъишай ихьтин серенжемар гележегдани давамардайдахъ инанмишарна.
Спортдин мярекатдин вири иштиракчийри суьгьбетар ачух суфрадихъ давамарна.
Регина Семедова
