Чпин ери-бине КцIар райондин Вини­ Тагьиржал хуьряй тир, Дербент ше­гьерда хана, ана яшамиш жезвай­ стха­яр-спортсменар Агьмад ва Муслим Ибрагьимоврилай, чпин гъве­чIи яша­ризни килиг тавуна, Бразилиядин джиу-джитсудай агалкьунар къазанмишиз алакьнава. ИкI, алатай вацра 8 йис тамам хьанвай Агьмад Евразиядин кьве сеферда, Европадин, Россиядин ва Дагъустандин  кIвен­кIвечивал патал акъажунрин гъалибчи я. Агьмада Кеферпатан Кавказдин гзаф кьадар турниррани кIвенкIвечи чкаяр кьуна.

ЧIехи стхадилай чешне къачузвай­ Мус­лим лагьайтIа (январдин вацра адан 6 йис тамам хьанва), джиу-джит­су­дал машгъул жез са йисалай артух вахт я. Амма спортдин и жуьредай вичихъни­ ала­кьунар авайди субутнава. ИкI, алатай­ вацра­ адакай Дагъустандин кIвен­кIвечи­вал па­тал акъажунрин гъалибчи хьана­. Къейдна кIанда хьи, ам Европадин кIвен­кIвечивилин тIвар­цIин (и акъажунра ам ви­челай 5-6 кг-дин артух заланвал авайбурухъ галаз бягьсиниз экъечI­на), Дагъус­тандин кубокрин сагьиб ва республикадин жуьреба-жуьре турниррин гъалибчи­ни я. Муслим Евразиядин, Россиядин кIвен­кIвечивал патал акъажунрин финалризни акъатна. ГъвечIи яшара аваз ихьтин тежриба хьуни, шаксуз, адахъ гележегда зурба агалкьунар жедайдан гьа­къиндай шагьидвалзава.

Стхайрихъ джиу-джитсу­дай рагъул ран­гунин чIулар ава. Абуру­ Дер­бентда тренер, дуьньядин, Евразия­дин­ ва Россиядин чемпион тир чи ватан­эгьли Мурад Къурба-налиеван гъилик «Аку­ла» спортзалда чпин устадвал хкажзава.

Рагнеда Рамалданова