Алатай вацран эхирра Чечнядин меркез Грозныйда Бразилиядин джиу-джитсудай (кимоно алаз ва кимоно алачиз бягьсериз экъечIунин жуьрейрай) TWW лигадин дуьньядин Кубок патал акъажунар кьиле фена. Ана саки 2000-дав агакьна спортсменри иштиракна. Абурун арадай яз, чи гъвечIи ватанэгьлияр, чна идалай виликни чпикай хабар гайи стхаяр Агьмад ва Муслим Ибрагьимоврини чпин устадвал къалурна. Абур кьведни кимоно алачиз экъечIунин жуьредай буьруьнждин медалриз лайихлу хьана. Гила абур кьведни Бразилиядин джиу-джитсудай хъипи рангунин чIуларин сагьибар я.
Чпин ери-бине КцIар райондин Вини Тагьиржал хуьряй тир, Дербент шегьерда хана, гьана яшамиш жезвай стхайрилай-спортсменрилай, чпин гъвечIи яшаризни килиг тавуна, Бразилиядин джиу-джитсудай агалкьунар къазанмишиз алакьнава. ИкI, Агьмад Евразиядин кьве сеферда, Европадин, Россиядин ва Дагъустандин кIвенкIвечивал патал акъажунрин гъалибчи ва призёр я. Ада Кеферпатан Кавказдин гзаф кьадар турниррани кIвенкIвечи чкаяр кьуна. Муслим лагьайтIа, спортдал машгъул жез са акьван гзаф вахт туштIани, чIехи стхадилай чешне къачузвай ада вичихъни алакьунар авайди субутнава. Ам Дагъустандин кIвенкIвечивал, Кубок патал акъажунрин гъалибчи ва призер я, Евразиядин, Россиядин кIвенкIвечивал патал акъажунрин финалризни акъатна. Стхайри — Ибрагьимоври Дербентда тренер, дуьньядин, Евразиядин ва Россиядин чемпион тир чи ватанэгьли Мурад Къурбаналиеван гъилик «Акула» спортзалда чпин устадвал хкажзава. ГъвечIи яшара аваз ихьтин агалкьунар къазанмишиз алакьуни, шаксуз, абурухъ еке гележег жедайдан гьакъиндай шагьидвалзава. Амма чи уьлкведин чIехи шегьерра ва дуьньядин кесерлу майданра кьиле физвай хейлин акъажунра жаванривай, такьатар тахьун себеб яз, иштиракиз жезвач. Чна умудзава хьи, чи гъвечIи пагьливанриз куьмекдин гъил яргъи ийидай кьегьал рухваярни майдандиз акъатда.
Рагнеда Рамалданова
