Олимпиададин чемпионар
Парижда (Франция) кьиле фейи Олимпиададин къугъунра са жерге дагъустанви спортсменар азаддиз кьуршахар кьунай ва тхэквондодай кIвенкIвечи чкайриз лайилу хьана. Чи гадайрикай пуда — къизилдин, сада — гимишдин ва кьве касди кишпирдин медалар къачуна.
ИкI, Олимпиададин чемпионар хьайибурун арада Разамбег Жамалов (Хасавюрт шегьердай я, къугъунра Узбекистандин патай экъечIна), Агьмед Тажудинов (Гергебил райондай я, Бахрейндин патай экъечIна) ва Мегьамед Рамазанов (Хасавюрт райондин Октябрьское хуьряй я, Болгариядин патай экъечIна) ава.
Гьашим Мегьамедов (Шамил райондай я, Азербайжандин патай экъечIна) тхэквондодай гимишдин медалдиз лайихлу хьана.
Кишпирдин медалар Даурен Куругълиевазни (Хив райондай я, Грециядин патай экъечIна) Мегьамедхан Мегьамедоваз (Къизляр райондин Александрийская станицадай я, Азербайжандин патай экъечIна) кьисмет хьана.
Абуруз дуьньядин винел виридалайни кесерлу акъажунар яз гьисабзавай Олимпиададин къугъунра гъалиб хьун Дагъустандин Кьил Сергей Меликова мубаракна. «Чна чи чемпионриз инанмишвилелди къачунвай чIехи гъалибвилер мубаракзава. Дагъустан дуьньядин майданра лайихлудаказ машгьур авунай сагърай! ГьакIни гъалибчийрин тренерриз, мукьвабуруз, абурухъ рикI кайи вири дагъустанвийриз мубаракзава», — кхьена С.Меликова вичин телеграм-каналда.
Агьмед Магьмудов
«Кьурагьрин къугъунар»
10-августдиз Кьурагьрин хуьре «Кьурагьрин къугъунар» лишандик кваз спортдин милли жуьрейрай ирид лагьай сеферда тешкилнавай акъажунар кьиле фена.
Физкультурникдин йикъаз талукьарнавай и турнирда цIи республикадин шегьеррайни районрай атанвай 150-далай виниз спортсменри иштиракна. Абуру чпин алакьунар, къуватар чIемерукрай ягъунай, 2000 метрдин мензилдиз чукурунай, турникрал чене, ярх хьана, жуван винел штанга хкажунай, цIил ялунай ахтармишна.
Спортдин саки гьар са жуьредай къизгъин акъажунар кьиле фена. Нетижада, ярх хьана, штанга хкажунай Эдгар Алибегов (Кьурагь) виридалайни къуватлу хьана. 2000 метрдин мензилдиз чукурунай Жамал Саркаров (Усугъчай) гъалиб хьана, чIемерукрай лишан виридалайни хъсандиз Гьажимугьаммад Гьажимегьамедова (Ярагъ-Къазмаяр) яна, чене хкажунай Тагьир Магьрабовав (Герейханово) садни агакьнач. ЦIил ялунай 1-чкадиз — КьепIиррин, 2-чкадиз — ЦIийи Макьарин ва 3-чкадиз Кьурагьрин командаяр лайихлу хьана.
КIвенкIвечи чкаяр кьур спортсменриз медалар, грамотаяр, пулдин ва спортдин пишкешар гана. Командайрин арада 1-чка Кьурагь райондин командади кьуна. Турнирдин иштиракчийриз Дагъустандин муфтиятдин Кьурагь районда авай отделдин патай тIямлу хуьрекар алай суфраяр ачухнавай.
Къейд ийин хьи, цIи «Кьурагьрин къугъунар» турнир тешкилнавайбурун арада Кьурагь райондин администрациядин физкультурадин, спортдин ва жегьилрин крарин рекьяй отдел, мергьяматлувилин «ЛЕКИ» фонд ва Дагъустандин муфтиятдин Кьурагь районда кардик квай марифатдин отдел авай.
Чи мухбир
ВикIегьбурун акъажунар
10-августдиз Ахцегьрин хуьре армрестлингдай КьакIарин хуьряй тир Шагьбуба Ханбабаеван экуь къаматдиз бахшнавай турнир пуд лагьай сеферда кьиле фена. Гьар йисуз тешкилун адет хьанвай и акъажунра Кьиблепатан Дагъустандин районрай атанвай спортсменри иштиракна.
Спортдин мярекат Физкультурникдин йикъаз талукьарнавай. Агъадихъ чна заланвилин жуьреба-жуьре категорийрай кIвенкIвечи чкаяр кьурбур раижзава.
40 килограммдал къведалди — Самир Лачинов, Къази Саидмегьамедов, Акиф Ризванов (Ахцегь район); 50 килограммдал къведалди — Ражаб Мегьамед, Фаргьад Сардаров, Салагьудин Магьсубов (Ахцегь район); 60 килограммдал къведалди — Самир Тагьирбегов (СтIал Сулейманан район), Адим Эмирсултанов (Докъузпара район), Муслим Назиров (Ахцегь район); 80 килограммдал къведалди — Зейнуллагь Хидиров, Шакир Муслимов, Руслан Муслимов (Ахцегь район); 90 килограммдал къведалди — Шагьбала Шагьэмиров, Гьуьсейн Азизагъаев, Мугьаммад Кисриев (Ахцегь район).
Акъажунрин гъалибчияр медалриз, грамотайриз ва пулдин пишкешриз лайихлу хьана. Турнирдин спонсорвал авур армрестлингдай тренер И. Шагьэмирова спортдин мярекат тешкилунин карда вичиз куьмекар гайибуруз сагърай лагьана.
Чи мухбир
