Са шумуд югъ идалай вилик Ульяновск шегьердин «Волга-Спорт-Арена» спорткомплексда ММА-дай кьиле фейи FIGHT NIGHTS чемпионатда 100-лай виниз спортсменри чпин устадвал къалурна. ИкI, гзаф заланвал авайбурун арада СтIал Сулейманан райондин Агъа СтIалдилай тир Казбек Сайдалиева къизилдин медаль, чемпионвилин тIвар къазанмишна. Финалда адаз Ульяновск­дай тир тежрибалу спортсмен Омар Алиев кумукьна. Чна чи ватанэгьлидиз спортдин уьмуьрда лишанлу вакъиа ри­кIин сидкьидай тебрикзава.

РикIел хкин, К. Сайдалиевахъ агал­кьунар икьван гагьдани тIимил хьанач.

***

И мукьвара Леваши хуьре, Россиядин государстводин ва политикадин машгьур деятель Мегьамедали Мегьамедован экуь къаматдиз бахшна, физкуль­ту­ра­динни милли спортдин мяре­кат кьиле фена. Багьа­  мугь­манрин арада­ РФ-дин Президентдин Админист­ра­ция­дин регьбердин­ заместитель Мегьамед­салам Мегьамедов­, РД-дин Гьукуматдин Председатель­ Абдул­муслим Абдулмуслимов, Дагъус­тан­дин­ Халкьдин Собранидин Председатель Заур Аскендеров, РД-дин НС-дин комитетрин регьберар, рес­публикадин районрин ва шегьеррин кьиле авай ксар ва масабур авай.

Дагъустандин шегьеррай ва районрай атанвай 100-лай виниз спортсменри иштиракай спортдин милли чемпионатда Мегьарамдхуьруьн райондай тир Руслан Закиева 100 метрдиз чукурунай кIвенкIвечи чка кьуна. Ам ва гъалибвилер къазанмишай амай спортсменарни грамотайриз, кубокриз ва пулдин пишкешриз лайихлу хьана. Идакай чаз Мегьарамдхуьруьн райадминистрациядин пресс-къуллугъди хабар гана.

***

Алатай гьафтеда Кьурагьа, «Саналди» лишандик кваз, райондин хуьрерин командайрин арада мини-фут­болдай турнир — дуствилин Кубок — кьиле фена. Райадминистрациядин физический­ культурадинни спортдин­ ва жегьилрин крарин рекьяй комитетди ДЮСШ-дихъ галаз санал ингье 7-сеферда тешкилнавай спортдин и серенжемдин макьсад райондин жегьилрин арада садвал, дуствал мягькемарун ва футбол­ къугъунин устадвал хкажун тир. Турнир кьиле тухун патал кьурагьви, Моск­вада яшамиш жезвай карчи Тельман­ Саидова спонсорвилин куьмекар гана.

Ана райондин хуьрерин (Кьурагь, КьепIир, КIири, Хпеж, Ашар, Моллакент) ва Махачкъала шегьердин 12 командади иштиракна. Итижлудаказ ва хъсан тешкиллувал аваз кьиле фейи къугъун­ра «Фермер» команда — 1, «Нурэлект­ро» — 2 ва «Лекьер» 3-чкайриз лайихлу ­хьана.

Гъалиб хьайи командайрив кубокар, медалар ва грамотаяр вахкуниз талукьарнавай шад мярекатдал турнирдин спонсор Т. Саидоваз районда  физкультура ва спорт вилик тухунай, гьакIни жегьилрин арада сагълам уьмуьр тухун пропаганда авунай «Кьурагь район» МР-дин кьил Замир Азизован патай чух­с­агъулдин чар гана.

Рагнеда  Рамалданова