Кьурагьани Сардархуьре…
Са тIимил йикъар идалай вилик Кьурагь райондин КIирийрин хуьруьн школа-интернатда, Советрин Союздин Игит Эсед Салигьован экуь къаматдиз бахшна, итимрин арада волейболдай республикадин 52-турнир кьиле фена.
Акъажунра Хив, Дербент, Мегьарамдхуьруьн, Ахцегь районрай ва Дербентдай тир командайри иштиракна. Спортдин майдандал кьве дестедиз пай хьана, къугъвазвайбурун алакьунрикай гзаф кьадар тамашачийрини лезет хкудна.
Къугъунра Кьурагь райондин команда 1-чкадиз лайихлу хьана. Дербент ва Хив районрин командайри 2 ва 3-чкаяр кьуна. Гъалибчийрив шабагьар вахкудай мярекатда Кьурагь райондин кьил Замир Азизова, кIвенкIвечи чкаяр кьурбур тебрик авуналди, виридахъ мягькем сагъвал, спортда мадни еке агалкьунар хьун алхишна. Турнирдин багьа мугьманрин жергеда образованидин гьуьрметлу къуллугъчи, спортдин ветеран Нурагьмед Катибовни авай. 1971-йисалай инихъ и турнир ада кьил кутуналди тешкилзава.
Хъсан тешкиллувал аваз кьиле фейи турнирда кIвенкIвечи чкаяр кьур вири командайриз медалар, грамотаяр, пулдин ва спортдин пишкешар гана.
***
3-майдиз Кьурагьа, Дагъустандин халкьдин артист Исамудин Агьмедован экуь къаматдиз бахшна, Кьиблепатан Дагъустандин умуми образованидин идарайра кIелзавай аялрин арада волейболдай кьиле фейи турнирда Мегьарамдхуьруьн, Ахцегь, Кьурагь районрин ва Белиж посёлокдин командайри иштиракна.
ИкI, хъсан тешкиллувал аваз ва судьяйрин къарардалди кругдин къайдада кьиле фейи къугъунрин нетижада Кьурагь райондин командади гъалибвал къазанмишна. Белиж посёлокдин командади — 2, Ахцегь райондин командади 3-чкаяр кьуна. Гъалибчийрив шабагьар вахкудай мярекатда И. Агьмедован багърийрини иштиракна. Турнир тешкилунай ва кьиле тухунай абурув Кьурагь райондин кьил З. Азизован патай Чухсагъулдин чар вахкана. Чпин нубатдай яз, рагьметлудан багърийрини райондин кьиле авай ксариз сагърай лагьана, турнир къведай йисузни давамардайди раижна.
КIвенкIвечи чкаяр кьур вири командайриз медалар, грамотаяр, пулдин ва спортдин пишкешар гана. Гъалибчи командадиз — гуьрчег Кубокни. Судьяйрин кIвалахдизни къимет тагана тунач.
***
Са шумуд югъ идалай вилик СтIал Сулейманан райондин Сардархуьре жаванрин арада дзюдодай республикадин кIвенкIвечивал патал акъажунар кьиле фена. Ана Махачкъала, Дербент, Буйнакск, Къизилюрт шегьеррай, СтIал Сулейманан, Мегьарамдхуьруьн, Хив, Новолак, Къаякент, Агъул районрай тир 100-лай виниз спортсменри иштиракна.
Турнир ачухуниз талукьарнавай шад мярекатдал СтIал Сулейманан райондин администрациядин кьилин 1-заместитель Лацис Оружева, спортдин, туризмдин ва жегьилрин крарин рекьяй комитетдин директор Чингиз Абдулмежидова, «Леки» ФК-дин президент Р. Агъамирзоева ва масабуру жаванрин тIварцIихъ чими келимаяр лагьана.
Къизгъиндаказ кьиле фейи акъажунрин нетижада СтIал Сулейманан райондин дзюдоистрин командади 1-чка кьуна. Дагъустандин кIвенкIвечи лагьай тIварцIиз Ибрагьим Эседуллаев, Назим Мейланов, Вели Саругъланов, Замир Магьмудов лайихлу хьана.
Рагнеда Рамалданова
