Спортдин хабарар
Чи баркаллу рухваяр
Гьар йисан январдин эхирра Красноярскда азаддаказ кьуршахар кьунай кьиле тухузвай ва спортсменар патал чпин къуватар ахтармишдай кесерлу майдандиз элкъвенвай Иван Ярыгинан Кубок патал международный турнирда жуьреба-жуьре йисара чи ватанэгьлийрикай хейлинбуру чпин устадвал къалурна. ЦIи ана Рамазан Ферзалиев 65 кг-дин заланвал авайбурун арада гимишдин медалдиз лайихлу хьана. РикIел хкин, 2019-йисуз ада буьруьнждин медаль къазанмишнай.Р. Ферзалиев 1995-йисан 19-февралдиз Бамматюртда дидедиз хьана. Адан бубайрин ери-бине Ахцегь райондин Балуджа хуьр я. Алатай асирдин 50-йисара анин агьалияр Хасавюрт райондин Къурушдал, Бамматюртдиз, муькуь пай Кьурукалал куьч хьанай. Вичин уьмуьрдин саки са пай вахтунда спортдал рикIивай машгъул жезвай чи ватанэгьлиди Хасавюртда стхаяр тир Ирбайхановрин тIварунихъ галай СДЮШОР-да тренерар Олхозур Минтулаеван ва Ваха Ирбайханован гъилик спортдин сирер чирна. Алатнавай йисара ада еке агалкьунар къазанмишна. ИкI, 2015-йисуз Россиядин Кубок патал акъажунра 57 кг-дин заланвал авайбурун арада виридалайни хъсан спортсмен яз гьисабай Рамазан Ферзалиев Дагъустандин жаванрин (2016-йис) ва студентрин арада (2017-йис) чемпионвилин тIварарин сагьиб я. Ада вирироссиядин хьиз, международный, гьа гьисабдай яз, Али Алиеван (2018-йис), Иван Ярыгинан (2019-йис), Александр Медведан (2021-йис) ва маса турнирра, гьакIни Умаханован тIварунихъ тешкилай континентрин уртах Кубок патал акъажунра приздин чкаяр кьуна, международный классдин спортдин мастер Санан Личгоряеван экуь къаматдиз бахшнавай 5-турнирда гъалибвал къазанмишна, 61 кг-дин заланвал авайбурун арада хьайи ам, чип вегьиналди, автомашиндизни лайихлу хьана.
2019-йисуз Якутскда азаддаказ кьуршахар кьунай дуьньядин Кубок патал акъажунар кьиле фенай. Россиядин хкянавай командадик 7 дагъустанви квай. Финалдин бягьсера чи командади 9:1 гьисабдалди Ирандин хкянавай командадин винел гъалибвал къазанмишнай. Нетижада эхиримжи 8 йисуз, сифте сефер яз, и турнирда кIвенкIвечи чка кьуна. И еке агалкьуник чи кьве ватанэгьлидин - Рамазан Ферзалиеван ва Даурен Куругълиеван лайихлу пайни квай, турнирда абуру чпин вири бягьсер вини дережада аваз кьиле тухванай. И ва гуьгъуьнин йисузни Россиядин чемпионатрани Рамазан Ферзалиева 61 кг-дин заланвал авайбурун арада гимишдин медалар къазанмишнай.
Хайи югъ, къазанмишнавай нубатдин агалкьун тебрик авуналди, чна Рамазан Ферзалиеваз мадни чIехи кукIушар муьтIуьгъардай къуватар хьун алхишзава.
***
И йикъара Хасавюртда боксдай Дагъустандин кIвенкIвечивал патал кьиле фейи акъажунра 15-16 йисара авай жаван пагьливанри чпин устадвал къалурна. Абурун арада чи ватанэгьлиярни ава. ИкI, Хаир Хаиров (57 кг, Каспийск) - 1, Гьабиб Насруллаев (60 кг, Къизляр), Дашдемир Шабанов (50 кг) ва Агъабала Агъабалаев (52 кг, жаванар кьведни Белиждай я) 2-чкайриз лайихлу хьана.
***
26-январдиз Дербентда Дагъустандин кIвенкIвечивал патал грэпплингдай ва ММА-дай кьиле фейи акъажунра Мегьарамдхуьруьн райондай тир 12 спортсменди кIвенкIвечи чкаяр кьуна. ИкI, абурун тренер, Кучун-Къазмайрин школадин директор Фарид Шагьмурадован малуматдал асаслу яз, Ильгар Агъаметов (20 кг), Абубакр Саидов (24 кг), Мурадхан Ибрагьимов (52 кг) ММА-дай ва Заур Исаев (60 кг), Салман Велиханов (65 кг) 1-чкайриз лайихлу хьана. Мугьаммад Шихмурадова (28 кг) ММА-дай - 2 ва грэпплингдайни 3-чкаяр кьуна. Камал Гьажиев (30 кг), Камил Гьажиев (30 кг), Ислам Велиханов (44 кг) - 3 ва Амин Эмиргьамзаев (40 кг) ММА-дай - 2, гьакIни Артур Ханбутаев (52 кг) грэпплингдай 3-чкайриз лайихлу хьана.
Рагнеда Рамалданова