Са шумуд югъ идалай вилик Эрменистандин меркез Ереванда азаддаказ кьуршахар кьунай военный рекьяй къуллугъчийрин арада дуьньядин чемпионат кьиле фена. Ана 40 уьлкведай, гьа гьисабдай яз, Россиядай, Ирандай, Иорданиядай, Италиядай, США-дай, Колумбиядай, Албаниядай, Саудрин Аравиядай 400-далай виниз спортсменри гьасиррал чпин устадвал къалурна. Абурун арадай тир чи машгьур ватанэгьли, Къазахстандин патай экъечIзавай Камил Куругълиев (97 кг-дал къведалди заланвал авайбурун арада) къизилдин медалдиз лайихлу хьана.
ИкI, 1-раундда Камила Индиядай тир спортсмендихъ галаз кьиле тухвай бягьс 11:0 гьисабдалди акьалтIна. Гуьгъуьнлай чи ватанэгьлидиз Монголиядин векил, финалдани Ирандай тир Шариати Ниа Даниал кумукьна.
РикIел хкин, 20 йиса авай Камил алай йисан сентябрдиз Испаниядин Понтеведра шегьерда кьиле фейи дуьньядин чемпионатда (92 кг-дал къведалди заланвал авайбурун арада) 3-чкадиз лайихлу хьана. Тренерар тир Роман Агьмедханован ва Мегьамед Куругълиеван (буба) гъилик устадвал хкажзавай ам, Къазахстандин хкянавай командадик кваз, кьилди къачуртIа, дуьньядин (17 йисал къведалди яшда авайбурун арада) ва Азиядин чемпионвилин (21 йисал къведалди яшда авайбурун арада) тIварарин сагьиб я.
***
Алатай гьафтеда ХМАО-Юградин Ханты-Мансийск шегьерда ММА-дай дуьньядин чемпионат кьиле фена. Къейд авун лазим я хьи, спортдин и жуьредай дуьньядин дережадин акъажунар чи уьлкведа сад лагьай сеферда кьиле тухвана. Шадвилелди мадни а кардикай хабар гуз кIанзава хьи, дуьньядин 30-далай виниз уьлквейрин векилри иштиракай и акъажунра чи ватанэгьлияр тир Сахил Шакирова (61,5 кг-дал къведалди заланвал авайбурун арада) — къизилдин ва Фахрудин Шихкеримова (83,9 кг-дал къведалди заланвал авайбурун арада) гимишдин медалар къазанмишна.
Чахъ авай малуматралди, Сахил Шакирован ери-бине Азербайжандин КцIар райондин лезгийрин Пирал хуьряй я. Дуьньядин чемпионатдин финалда адаз Тажикистандай тир Мугьаммадкабир Назардоза нокаутдалди кумукьна. Спортдин кесерлу майданра им ада къазанмишнавай сад лагьай агалкьун я.
Вичин ери-бине Кьиблепатан Дагъустандай тир, алай вахтунда Нефтеюганск шегьерда яшамиш жезвай Фахрудин Шихкеримов 17 йисалди азаддаказ кьуршахар кьунал машгъул хьана, и жуьредай ам спортдин мастер (2018-йис), хейлин турниррин ва округдин чемпионатрин кIвенкIвечи я. Ада вичихъ ММА-дайни хъсан алакьунар авайди субутна. Кьилди къачуртIа, ада 17 йисал къведалди яшара авай жаванрин арада Россиядин, УРФО-дин, ХМАО-Юградин кIвенкIвечивал патал акъажунра са шумудра 1-чкаяр кьуна. Ам Россиядин Кубокдин сагьиб я.
***
1-декабрдиз Тюменда дзюдодай Россиядин Кубок патал акъажунар акьалтIна. Ана уьлкведин 50-дав агакьна субъектрай 220-далай виниз спортсменри иштиракна. Вичин ери-бине Мегьарамдхуьряй тир машгьур спортсмен Рамин Баязов 90 кг-дал къведалди заланвал авайбурун арада буьруьнждин медалдиз лайихлу хьана.
Рагнеда Рамалданова
