РД-дин Кубокдин сагьиб
17-ноябрдиз Махачкъалада, «Труд» стадиондал, футболдай Дагъустандин Кубокдин финалда Мегьарамдхуьруьн райондин «Леки» ва «Хасавюрт район» командайрин къугъун 2:0 гьисабдалди акьалтIна. Тренер Тофик Къадимован регьбервилик кваз «Лекиди» Дагъустандин Кубок гила 3 сеферда къазанмишнава.
Агалкьунар хьайи командайрив шабагьар вахкуниз талукьарнавай шад мярекатда Дагъустандин Халкьдин Собранидин депутат Ислам Гьуьсейханова, РД-дин физический культурадин ва спортдин министрдин заместитель Будун Будунова, республикадин футболдин федерациядин председатель Шигьабудин Микаилова, «Динамо» командадин президент Гьажи Гьажиева ва масабуру иштиракна.
РикIел хкин, алай вахтунда футболдай Дагъустандин чемпионатни эхирдиз къвезва. Чун умудлу я хьи, Дагъустандин чемпионвилин тIвар 8 сеферда къазанмишнавай чи командадин «киседиз» и йикъара мад са гъалибвал къведа. 2007-йисуз арадал атай «Леки» командадин президент Рафик Агъамирзоев я.
Къурушвийрин агалкьунар
14-ноябрдилай 17-ноябрдалди Москвада пауэрлифтингдай (гьакIни къуватдин двоеборьедай, са шумуд жуьре жимдай, пауэрспортдай, армлифтингдай ва икI мад) дуьньядин X чемпионат кьиле фена. Ана дуьньядин саки 40 уьлкведай тир, гьакI Россиядин 85 субъектдай, гьа жергедай яз Дагъустандайни, 3 агъзурдав агакьна спортсменри иштиракна.
Шадвилелди а кардикай хабар гуз кIанзава хьи, спортдин кесерлу майданда Докъузпара райондин Къурушрин хуьряй тир, тренер Фейруз Къулиеван гъилик устадвал хкажзавай жегьилрикай (чемпионатдиз 6 спортсмен фенвай, амма акъажунра абурукай анжах кьведа иштиракна) Дагъустандин са шумуд сеферда чемпион, 18 йисал къведалди яшара авайбурун арада са шумуд рекорддин сагьиб Мейлан Баширова ва Дагъустандин чемпион, республикадин рекорд эцигнавай Низами Къулиева гъалибвилер къазанмишна. ИкI, 20-23 йисарин яшара авай жегьилрин арада Мейлан Баширова пауэрлифтингдай — 2 ва чилелай штанга хкажунай (становой тяга) 1-чкаяр кьуна.
Низами Къулиев яшарин ачух категорияда пауэрлифтингдай — 2 ва чилелай штанга хкажунай 1-чкайриз лайихлу хьана.
Фейруз Къулиеван гъилик вердишвилер къачузвай спортсменрихъ идалай виликни еке агалкьунар хьайидакай хабарар гайиди рикIел хкиз кIанзава. Ам вични спортдин мастер, штанга хкажунай ва къуватдин троеборьедай Дагъустандин са шумуд сеферда чемпион, спортдин и жуьрейрай рекордрин сагьиб я.
Буьруьнждин медаль
Са шумуд югъ идалай вилик Казанда чIуларалди кьуршахар кьунай кьиле фейи дуьньядин чемпионатда (ана 18 уьлкведай 150-далай виниз спортсменри чпин устадвал къалурна) чи ватанэгьли, вичин ери-бине Кьурагьай тир, амма Владимирдин областдин патай экъечIзавай Имирбег Бабаев 68 кг-дин заланвал авайбурун арада буьруьнждин медалдиз лайихлу хьана. Спортдин и жуьредай дуьньядин чемпионатра гила ада 3 медаль къазанмишнава.
Гзафбуруз са акьван сейли тушир спортдин и жуьре лап къадим вахтарилай ава. Ам ЮНЕСКО-дин къаюмвилик ква. Адан тIварцIяйни аквазвайвал, бягьсиниз экъечIнавайбуру сада муькуьди, чIуларикай кьуналди, чилел ярхарун лазим я.
Рагнеда Рамалданова
