Р. Къазиагьмедован турнир

И йикъара СтIал Сулейманан районда­, «Жуьрэтлувиляй» ордендин сагьиб ­Роберт Къазиагьмедов рикIера хуьниз талукьарна, мини-футболдай респуб­ли­кадин дережадин турнир кьиле фена.­ Идакай чаз райадминистрациядин пресс­-къуллугъди хабар гана. Герейха­нован хуьруьн спортдин майдандал гзаф тамашачийрин ва мугьманрин иштираквал аваз кьиле фейи турнирда республикадин шегьеррай ва районрай атанвай спортдин ветеранрин командайри иштиракна.

Нетижада Левашидин командади 1-чка кьуна. Ахцегьрин — 2 ва «Дербент-Сити» командаяр 3-чкайриз лайихлу хьана.

Турнир агалунин ва кIвен­кIвечи чкаяр кьур командайрив шабагьар вахкунин мярекатда райондин кьилин 1-заместитель Лацис Оружева иштиракна. Райондин кьил Саид Темирханован тIварунихъай ада республикадин дережадиз акъатнавай турнирдихъ авай важиблувал къейдна, Роберт Къазиагьмедован экуь къамат рикIел хкана, турнир  тешкилайбуруз ва иштиракчийриз сагърай лагьана.

КIвенкIвечи чкаяр кьур командайрив кубокар, медалар, грамотаяр ва пулдин пишкешар вахкана. Турнирда тафаватлу хьайи са шумуд футболист кьилдин пишкешриз лайихлу хьана. Абурун арада Рамазан Атлуев (виридалайни хъсан варар хуьдайди, Леваши), Ренат Рамазанов (виридалайни хъсан защитник, Махачкъала), Фарид Гьамидов (виридалайни хъсан гьужумдайди, Дербент), Тимур Агьмадов (виридалайни хъсан къугъвайди, Ахцегь) ава.

Гьазурвал ахтармишна

10-октябрдиз Кьурагь райондин администрациядин заседанийрин залда Вирироссиядин физкультурадинни спортдин «Готов к труду и обороне» (ГТО) комплексдин нормативар вахкуниз талукьарнавай райондин 7-чемпионатдин гъалибчийрив ва призеррив шабагьар — медалар, грамотаяр, спортдин пишкешар — вахкана. И мярекатда райадминистрациядин аппаратдин регьбер Фикрет Медетова, админист­рациядин физический культурадинни спортдин ва жегьилрин крарин рекьяй отделдин начальник Рамиз Рамазанова иштиракна.

РикIел хкин: спортдин серенжем Кьурагьа 8-октябрдиз кьиле фена. ГТО-дин тес­тированидин центрадихъ галаз санал ам райадминистрациядин физический куль­турадинни спортдин ва жегьилрин кра­рин рекьяй отделди тешкилнавай. Ам тIвар кьунвай отделдин начальник Рамиз Рамазанова ачухна. Сифте гаф райондин кьил Замир Азизоваз гана. Виниз тир дережад­а райондин чемпионат тешкилайбурун ва ана иштиракзавайбурун тIварунихъ чими келимаяр лугьунихъ галаз сад хьиз, З. Азизова районда спортдиз ва ГТО-диз гележегдани артух фикир гудайди къейдна.

Санлай къачурла, ГТО-дин нормати­вар 18-далай 70 йисалди яшара авай 80-далай виниз агьалийри вахкана. Абурун арада райондин жуьреба-жуьре идарайрин ва тешкилатрин векиларни авай. Спортдин 8 жуьредай (60 метрдиз ва 2 километрдиз чукурунай, акъвазай чкадилай хкадарунай, турникдал чене акъудунай ва ик­I мад) чпин алакьунар къалурай абуру гила­ республикадин чемпионатда иштиракда.

Акъажунрин гъалибчияр

Са шумуд югъ идалай вилик Кас­пийскда грэпплингдай (кимоно алаз ва кимоно алачиз) турнир кьиле фена­. Ана чи республикадин шегьеррай­ ва са жерге районрай тир 200-дав агакьна жаванри чпин устадвал къалурна.

ИкI, грэпплингдин кимоно алачиз­ бягьс чIуг­вадай жуьредай 69 кг-дал къведал­ди заланвал авайбурун арада­ чи кьве ватанэгьлиди, кьилди къа­чур­тIа, Избербаш шегьерда яшамиш жезвай Имам Эседова — 1 ва Ахцегь райондин ЦIийи Усуррин хуьряй тир Мугьаммад Шагьбанова 2-чкаяр кьу­на. Къуй чи кьегьалрихъ спортдин рекье еке агалкьунар хьурай!

Рагнеда  Рамалданова