Агьмед  Магьмудов

Мукьвара Ахцегь райондин Смугъулрин хуьре футболдай Украинада кьиле физвай дяведин махсус серенжемда телеф хьайи кьегьалрин экуь къаматдиз бахшнавай турнир кьиле фена. Акъажунра Махачкъала, Дербент шегьеррин, Шамхал поселокдин, Ахцегь, СтIал Сулейманан ва Кьурагь районрин ветеранрин (къугъвазвайбурун яшар 40 йисалай виниз тир) командайри иштиракна.

Къейд ийин хьи, турнир машгьур футболист, Кьиблепатан Дагъустанда спорт вилик финик чIехи пай кутазвай Мегьамед Алишевани СВО-дин иштиракчи, Ахцегь райондин администрациядин медениятдин управленидин къуллугъчи, ашукь Алихана тешкилнавай. Спонсорвилин куьмек гайибурун арада Ахцегь райондин кьил Абдул-Керим Палчаев, РД-дин Халкьдин Собранидин депутат Имам Яралиев ва жемиятдинни сиясатдин машгьур деятель Мамед Абасов авай. Луткунай тир машгьур меценат Жигерхан Сулейманова турнирдилай кьулухъ вири иштиракчийриз «Самур» ресторанда дадлу тIуьнар тешкилнавай. Мад са меценатди — Велимегьамед Нурмегьамедова — вичин такьатрихъ турнирдин иштиракчияр чуьхуьнагар авун патал сагъламвал мягькемарзавай «Верхние бани» гьамамдиз тухвана. Смугъулрин хуьруьн администрациядин кьил Аслан Мегьтиевани хуьруьз атанвай мугьманар дагъвийриз хас адетралди кьабулна.

Акъажунрин нетижада 1-чкадиз Дербент шегьердин команда лайихлу хьана. 2-чка — СтIал Сулейманан ва 3-чка — Махачкъала шегьердин ва 4-чка Ахцегь райондин командайри кьуна.

КIвенкIвечи чкайриз лайихлу хьайи командайризни акъажунра тафаватлу хьайи са жерге спортсменриз кубокар, дипломар, пулдин пишкешар ва рикIел аламукьдай савкьатар гана.