Гьуьрметлу газет кIелзавайбур!
Берекатривни мергьяматлувилерив ацIанвай рамазандин варз акьалтIна, чаз Сив хуьнин сувар (араб чIалал Ид аль-Фитр) мукьва жезва. Им вири дуьньядин мусурманри къейдзавай чIехи кьве суварикай сад я.
Рамазандин вацра сив хуьн Ислам диндин кьилин вад бинедик акатзава. Адет яз, мусурманри 29-30 юкъуз сивер хуьзва. Рамазандин вацран яргъивал лагьайтIа, цIийи варз экъечIзавай йифелай аслу жезва. Варцарин шагь яз гьисабзавай рамазандин вацрахъ динэгьлияр патал гьакъикъатдани чIехи метлеб ава, гьикI лагьайтIа, и вацра вичикай Къуръанда раханвай «Лайлат-уль-Къадр» йиф ава. И йифиз авур ибадат агъзур вацра авур ибадатрилай хийирлу я.
Пак рамазандин варз закатуль-фитIр (зеэр) гуналди акьалтI жезва. И садакьадин важиблувиликайни лайихлувилерикай чна газетдин алатай нумрада хабар ганай.
Рамазандин варз, вири йисара хьиз, цIини чи республикадин агьалийри шадвилелди кьиле тухвана, мергьяматлувилин мярекатар, ифтарар тешкилна. Анра неинки жергедин дагъустанвийри, жуьреба-жуьре тешкилатри, гьакI гьукумдин органрин векилрини иштиракна. Мергьяматлувилин фондари неинки са чи, гьакIни къецепатан уьлквейра четин гьалда авай мусурманриз куьмекар гун патал мергьяматлувилин серенжемар кьиле тухвана.
Играми стхаярни вахар! Рамазандин вацра сивер хвейи инсанар руьгьдин жигьетдай михьи жезва, абуру рикIин сидкьидай авур дуьаяр Аллагьди кьабулзава. Къуй чун Халикьдин вилик гунагьрикай михьи, Ада дуьаяр кьабулнавай мусурманрикай хьурай!
«Лезги газетдин» редакциядин коллективди квез Сив хуьнин сувар мубаракзава. Куьне хвейи сивер, авур къени крар, гайи садакьаяр Сад Аллагьди кьабулрай! Куь кIвалера – берекат, рикIера – иман, мецерал Аллагьдин тIвар хьурай! Чаз квехъ чандин сагъвал, бахтлувал, агалкьунар хьана кIанзава.
