И мукьвара Москвадин Объединённый гуманитарный издательствода РФ-дин эдебият, ктабар чап авун ва кIелун хуьнин рекьяй тешкилнавай комитетдин (председатель С.Е. Нарышкин я) къаюмвилик кваз, «Россиядин халкьарин алай аямдин эдебият» лишан алаз, «Кеферпатан Кавказдин халкьарин шиират ва гьикаят» тIвар алай  антология чапдай акъатнава.

Мелованный чарчел чIехи форматда аваз акъуднавай, 656 чиникай ибарат и ктабда Кавказдин бинедин 16 халкьдин – абазинрин, аваррин, лезгийрин­, агъулрин, адыгрин, даргийрин, ингушрин­, кабардинрин, каратинрин, кубачийрин, яхулрин, рутулрин табасаранрин, цIахуррин, черкесрин ва чеченрин – шаирринни гьикаятчийрин эсерар хайи чIаларалди ва урус таржумайра аваз чапнава. Гьар са халкьдиз талукь паюна милли эдебиятдикай куьруь макъала ва ктабдин эхирда, алфавитдин къайда хвена, вири авторрин куьруь таржумагьалар ганва. Ктабдиз издательстводин патай кхьенвай куьруь гафуна къейднавайвал, ана ганвайбур 1991-йисалай кьулухъ кхьенвай ва алай вахтунда эдебиятда кIвалахзавай авторрин эсерар я.

Чи писателрин эсерар авай пай фило­логиядин илимрин доктор, Дагъустандин­ халкьдин писатель Къурбан Акимован «Алай аямдин лезги эдебият» макъаладилай гатIун жезва. Авторди алатай ва алай асирра лезги эдебият вири хилерай вилик фейи рекьерикай, эхиримжи йисара чапдай акъатай эсеррикайни къелемчийрикай куьруьдаказ ва маналудаказ ихтилат ийизва.

Лезги эдебиятдиз талукь паюна Сажидин Саидгьасанован, Ханбиче Хаметовадин, Фейзудин Нагъиеван, Майрудин Бабаханован, Азиз Мирзебегован, Арбен Къардашан, Гъулангерек Ибрагьимовадин, Владик Батманован шиирар ва Абдуселим Исмаилованни Нариман Ибрагьимован гьикаяяр гьатнава. Чи авторрин эсерар урус чIалаз Максим Амелина, Виктор Куллэди, Алёна Каримовади, Юрий Татаренкоди, Ирина Ермаковади, Евгения Коробковади, Ирина Четверговади таржума авунва.

Кьилди къейд ийиз жеда хьи, цIа­хуррин эдебиятдиз талукь паюна гьатнавай ругуд автордин шиирарни гьикаяяр урус чIалаз элкъуьрнавайди чи лезги таржумачи Мурад Саид я.

Ктабда гьар са халкьдин эдебият­ алфавитдин къайда хвена, гьар паюна­ авай авторар яшдиз чIехибурулай гъве­чIибуралди ганва. Антологиядин тираж 1000 экземпляр я.

Ктабдин кьилин презентация 4-7-июлдиз Москвада Яру майдандал кьиле фидай ктабрин фестивалдин вахтунда тухудайвал я.

Чи мухбир