И йикъара Герейханован хуьруьн Р.Османован тIварунихъ галай 1-нумрадин юкьван школада лезги чIаланни литературадин тежрибалу муаллим, РФ-дин Президентдин грантдин сагьиб Сегьерхалум Рашидовна Османовади чIехи алим ва зари Гьаким Къурбанан яратмишунриз талукьарнавай шад мярекат кьиле тухвана. Аниз са жерге мугьманризни эвер ганвай.
Сегьерхалум Рашидовнади Къурбан Халикьовичан аял вахтарикай, ам 5 йиса авай аял яз, буба дяведа телеф хьайидакай ва адан яратмишунрикай гегьеншдиз суьгьбетна. Вичихъ зигьин, камал авай гада кIелунин илимдин чIехи кукIушрал хкаж хьана. Зариди вичин цIуд романда, повестра ачухдиз чи тарих къалурнава.
Бажарагълу зариди лезги халкьдал агакьарун патал сифте яз 2001-йисуз Махачкъалада, “Мавел” чапханада 2000 экземплярдин кьадарда аваз, “Лезги зарияр” тIвар алаз, 154 автордикай кхьенвай ктаб чапна. Гуьгъуьнлай кьвед лагьай сеферда 329 касдикай 300 экземплярдин кьадарда аваз цIийи ктаб ахкъудна.
Лезги алимри — М.Гьажиева Б.Талибова, А.Гуьлмегьамедова ва масабуру туькIуьрнавай гафарганрин бинедаллаз, хейлин дегишвилер кухтуна, “Мавел” чапханада, 350 экземплярдин кьадарда аваз, 2017-йисуз “Лезги — урус гафарган” — чIехи ктаб акъудна. Ам мухбирриз, алимриз, студентриз, муаллимриз иллаки герекди я.
Къурбан Халикьовичан яратмишунриз талукьарнавай мярекатдиз теклифнавай шаир Сажидин Саидгьасанова, “Куьредин хабарар” газетдин редактордин заместитель Абидин Камилова, и цIарарин авторди юбилярдин адресдиз хуш келимаяр лагьана ва адаз бахшнавай шиирар кIелна.
Школьникри Гь.Къурбанан романрай, повестрай, маса эсеррай хейлин чIукар кIелна, сегьнеяр къалурна.
Чи шаирриз, алимриз талукьарна школада ихьтин мярекатар тухузвай Сегьерхалум Рашидовнадиз атанвай мугьманри чухсагъул лагьана.
Гь.Къурбаназ бахшна, зани кIелна:
Чи зарияр хкиз рикIел,
ЭкъечIна куьн шегьре рекьел,
Гьар са хуьре, лезги кимел,
ТIвар кьазва ви, Гьаким Къурбан.
Вун зарийриз арха хьана,
КIел-кхьиниз мукьва хьана,
Шалбуз дагъ хьиз кьакьан хьана,
Лезги зари Гьаким Къурбан.
Гъилелай физ агъзур дафтар,
Акъудна на кьудкъад йисар,
Яр-дустариз ачух ракъар
Хьана ви кIвал, Гьаким Къурбан.
Вадим Жамалдинов
